Indiamiut issittumi pissutsit ilisimalerusuppaat
India naalagaaffiillu allat tallimat, Issittumi Siunnersuisoqatigiit Sverigemi Kironami, sapaatit akunerisa marluk matuma siorna ataatsimiinneranni, alapernaatsutut inissisimalerput.
Indiallu aallartitaasa nuannarutiginerpaasaasa ilagaat, siunnersuisoqatigiinni alapernaatsutut inissisimalernerminni, issittup sikua pillugu ilisimasaqarnerulernissartik, tassami issittup sikusarnerata Indiami silap qanoq ittarnera annertuumik sunnertarmagu soorlu siallerujussuartarneranut atatillugu.
- Sialussuartarnerata ulluinnarni atukkavut inuussutissarsiutigullu sunnertarpai, taamaattumik silap pissusaata malinnaavigillualernissaa aamma silap allanngoriartornera pillugu paasisaqarnerulernissarput nuannaarutigaarput, Indiap aallartitaa, Shailesh Nayakm Indiami nutaarsiassaqartitsivimmut IANS-imut oqarpoq.
Shailesh Nayak Indiami ilisimatusarnermut ministeriuvoq.
- Alapernaatsutut Issittumi Siunnersuisoqatigiinni inissisimalernitsinni soqutigineruarput paasisanik nutaanik malinnaanerunissarput. Taamaattorli aamma soqutigisaraarput niuernikkut periarfissat aamma umiarsuartigut angallannikkut aqqutit nutaat atulernissaat soqutigisaralutigu, Nayak oqarpoq.
India issittumi 2008-mili ilisimatusarfimmik pilersitsivoq, taanna Spitsbergen-imiilluni aamma Sikuiuitsoq Kujallermi ilisimatusarfeqarlutik.
