Indiamiu sikkilertartoq Nunatsinnut aqqusaartussanngorpoq

Somen Debnath Norgemut ingerlaannginnermini maanna Aalborgimiiippoq, tassanngaanniillu Islandiliassaaq, tamassumalu kingorna Nunatsinnukassalluni, aviisi Nordjyske taama allappoq.

Somen Debnathip 2020-mi aatsaat Indiamut uteqqinnissani naatsorsuutigaa, tassa maannamiit ukiut qulingiluat qaangiuppata. Taamanikkornissaanut sikkilerluni 200.000 kilometerit atoreersimassavai.

Nunani aqqusaakkamini hiv aamma Aids pillugit oqalugiartarpoq, tamassumunnga pissutaavoq Somen Debnath meeraagami nappaammik taassuminnga oqaluttuunneqanngisaannarsimagami.

Ingerlaarnermini aningaasanik katersivoq, aningaasallu katersat napparsimmavimmik Aids-ertut uninngavigisinnaasaannik pilersitsinermut atorneqarnissaat pilersaarutigaa.

Taamaattumik nappaammut Aids-imut akiuiniarnermi peqataarusukkami sikkilerluni Somen Debnath i aviisimut Nordjyskimut oqarpoq.

Nappaatip taassuma kikkunit tamanit ilisimaneqalernissaa kissaatigigamiuk aamma nunarsuatta inuuffiginera nuannerneq kissaatigigamiuk taama iliornerarpoq.

- Ingerlaarninni Afghanistanimi Talebaninit tigusaanera eqqaassanngikkaanni nunani tamani tikilluaqqusaallunga misigisimavunga, Somen Debnath oqarpoq.

Ingerlaarnermini sikkilit arfinillit atorsimavai, tassami ilaanni aserortoortarsimagami aammalu ataasiarluni sikkilii tillinneqarsimallutik.