Indiami upalungaarsimatitat piareersimatinneqaleruttorput

Indiami sakkutuut Mumbaimi saassussisoqarnerata kingorna piareersimasuuteqarsimmanngitsutut isornartorsiorneqareeramik piareersimajuarnertik takutinniarsaraat.

Indiami isumannaallisaanermik suliaqartut isornartorsiorneqarnerat Mumbaimi ippassaq erseqqippoq. Qimuttuitsummi unittarfiani ulapaarfiunerpaami, peqqarniisaarniat saassussinerisa kingorna torersaanermi qaartartoq 10 kilotut oqimaatsigisoq nammattakkat akornannut igiinnarneqarsimasoq, qimmip kuniorlugu nassaaraa. Politiillu qaartartoq nassaarigamikku inuit qimuttuitsut unittarfianniittut kalerrinnagit qaartartoq qaartissinnaajunnaartinniarsimavaat. Nutaarsiassat taamaattut Indiamiut sakkutuuisa upalungaarsimatinniakkat sulinerisa qanoq isornartoqartiginerat takutippaat. Tusagassiuutit paasisimasaat naapertorlugit isertortumik paasiniaasartut akornanni sinngaqattaattoqarnerata kinguneranik suliassatik iluamik isumagisinnaanngilaat, upalungaarsimatinniakkallu saassussisoqanngitsorli aarlerisaarneqarsimagaluarlutik piffissanngormat piareersimasimanngillat. India 1,2 miliardinik inulik aamma hunnorujunik arlaqanngitsunik sakkortuumik saassussisoqarnissaanut piareersimasuutitaqarput, Delhimi inissinneqarsimasunik, taakkualu angallatigisinnaasaminnilluunniit timmisartoqanngillat. India Pakistanilu minnerunngitsumik Kashmiri pillugu ukiorpassuarni sorsuuteqqajaallutillu aaqqiagiinngittuarsimapput, peqqarniisaarniallu Mumbaimi saassussisut Pakistanimiit takkussimagunarmata, Indiamiut naalakkersuisuminnik sakkortuumik avoqqaarinnipput. Mumbaimi ippassaq akerliussutsimik takutitsisoqarnerani inunnut toqqissisimanartumik upalungaarsimasuutitaqalernissaq piumasarineqarpoq.