Indiami sakkulersortut nakkutigilluarneqalerput

Mumbaimi akunnittarfimmi akimasuumi allami aamma sallunaveeqqutitut tigusarinnittoqarpoq, sakkutuullu naalagaata oqaatigaa, akunnittarfimmi tassani Hotel Taj Mahalimi ikinnerpaamik 50-it toqutaasimasut. Aamma ullumikkut juutit katerisimaartarfiannut, Israelimiut arlallit tigusaaqqaffiannut, annaassiniartoqarpoq.

Peqqarniisaarnianut aaqqissuussamik pingasunngormat saassussisoqarnerani, Indiap aningaasarsiornikkut illoqarfiisa pingaarnersaani Mumbaimi ikinnerpaamik inuit 125-t toqutaapput 327-llu ikilerneqarlutik.

Akunnittarfinni saassussiffigineqartuni qallunaat marluk najugaqarsimapput, taamaattorli ajoqusersimanngitsut isumannanngitsullu, Danmarkimi nunanut allanut ministeeriaqarfik ilisimatitsivoq. Matumani pineqarput qallunaat niuertut marluk kaffisorniartarfimmi issialeruttortut peqqarniisaarnianit isaaffigineqarlutik eqqaassiffigineqartut. Kaffisorniartarfimmi eqqaassisoqalermat isersimaqatitillu natermut pallornermikkut inuunertik annaassimavaat.

Peqqarniisaarnianik saassussinermi sakkutuut naalagaata, R.K. Hoodap oqaatigaa, peqqarniisaarniat umiarsuarmut assartuummut ilaallutik Pakistanimit saassussiartortuunerarlugit.

Mumbaimi peqqarniisaarniat saassussineranni, maanna ulloq unnuarlu paatsiveerusimaarfiusumi, Pakistanimiut akuunerarlugit oqalunneq, Pakistanimiut naalakkersuisuisa sakkortuumik tunuartippaat.