Indiami meeqqat 12 milliuunit sulisorineqarput
Nunatsinni meeqqat juullernissaanut juullimilu atuanngiffeqarnissamut qilanaaleruttorput, nunanili allani meeqqat allatorluinnaq atugaqarsinnaasarput. Indiami meeqqat millionilikkaat ullormut nalunaaquttap akunnerini qulini – sapaatip-akunneranullu ulluni arfineq marlunni sulisarput!
Maannali Indiami meeqqat atugaat allanngortinniarneqalerput. Aallarniutigalugu pisortat meeqqat 750-it 14-it inorlugit ukiullit suliffiiniit qimagutsissimavaat. Tamanna meeqqat sulisorineqartarnerat pillugu inatsisip qanittukkut sukateriffigineqarnerata kingunerisa ilagaat.
Pappilissami allassimasut kusanaraluaqaat. Meeqqat hunnorujulikkaat arlallit tallimaniit 13-inut ukiullit inussiaatitupajaaq sulisikkunnaarneqassapput, taamaalillutik atuariartorsinnaaniassammata aamma meeqqatulli allatut pinnguarsinnaaniassammata.
Peqatigitillugu maannamuugallartoq sulisitsisut 60-it oktobarimi inatsisiliamut, meeqqanik sulisoqarnissamut inerteqquteqartumut, unioqqutitsisimasutut unnerluutigineqarput.
Inatsit nutaaq inatsisinut meeqqanut ulorianartunik suliaqartitsinissamut suliffissuarnilu sulisoqarnissamut inerteqquteqartunut ilassutaavoq. Amerlaqisulli inatsisit isiginngitsuusaartarmatigik ajornartorsiutaavoq.
Assersuutigalugu annoraaminiliorfinni ukiualuit matuma siornagut meeqqanik sulisoqarneq inerteqqutaalersinneqarpoq. Taava annoraaminiliorfinnik piginnittut ikaartiterussuarmik attartorput, misissuisoqartanngimmallu meeqqanik sulisoqarnertik ingerlatiinnarpaat. Meeqqat ullormut nalunaaquttap akunnerini qulini sapaatip akunneranullu ulluni arfineq marlunni sulisittarlugit.
Indiami ikinnerpaamik meeqqat 12 millionit sulisorineqarput. Tamatumunnga atatillugu eqqaamasariaqarpoq Indiamiut 1 milliardit sinnerlugit amerlassuseqarmata meeqqallu Indiamiittut USA-p inuinit amerlanerummata.
Meerarpassuit piitsuussuseq pissutigalugu sulisariaqartarput.
Assersuutigeriartigu siilikiliorfimmi sulisoq niviarsiaraq Divia qulinik ukiulik. Taanna arfineq marlunnilli ukioqarluni sulilersimavoq qaammammullu 25 koruuninik akissarsisarluni.
- Sulinanga atuarusunnerugaluarpunga, Divia oqarpoq. Kisianni angajoqqaakka naalakkannit aningaasanik attartugaqarmata sulisariaqarpunga, oqarpoq.
