Indiami inatsisartunut qinersineq naammassineqarpoq
Nunarsuarmi demokratiit annersaanni Indiami inatsisartunut qinersineq ullumi naammassineqarpoq, qinersisartut kingulliit 107 millionit qinersiartormata.
Allattoq Mads Lynge
maajip 13-at 2009 17:35
Indiami inatsisartunut qinersineq qaammammik ataatsimik maannamut sivisussuseqarsimavoq, inernerilli siulliit arfininngorpat aatsaat saqqummiunneqarsinnaanissaat ilimanarpoq.
Qinerseqqammersut apersorneqarneranni paasinarpoq partii naalakkersuisuutitalik Kongresparti qinersinermi amerlanerussuteqartoq.
Kongrespartiilli illuatungiliuttunilu partiit annersaat BJP qinersisaat partiinut minnernut allanut noorarsimasut, qinersisartunik isumasiuinerit takutippaat.
Tamanna naalakkersuisunngortitsiniarnissanut kingunerlutsitsisinnaavoq, isumaqatigiinniarnissat ajornakusuulissammata.
Indiami inatsisartunut qinersineq apriilip ulluisa 16-ianni aallarnerneqarpoq, qinersisartullu 700 millionit sinnerpaat, inatsisartunilu inissat katillugit 545-uupput.
