Indiami Afrikamilu ajunaarnersuit
Ikinnerpaamik inuit 100-t ikuallagussaallutik ajunaarput, Indiami New Delhi-p avannaatungaani niuffaffiit ilaanni Meerut-mi tuperpassuit niuerfittut atorneqartut ikuallalermata.
Arnat meeqqat angutillu uutitersimaqisut lastbiilit atorlugit napparsimaviliaassorneqarsimapput, maannamullu ilisarnarunnaavillutik ikuallagussaasimasut inuit timaat 45-t ikuallaffinniit piiarneqarsimapput.
Aamma Afrika-mi Ghana-mi ikaartaat 150-inik ilaasoqarluni umiummat, inuit 120-it ipillutik ajunaarsimanissaat ilimagineqarpoq. Ikaartaammut ilaasimasut 30-iinnaat maannamut annaanneqarsimapput, isiginnittuusimasullu oqaluttuarput, ikaartaat ilaasorpassuaqarnermi saniatigut useqarpallaarsimasoq, politiillu isumaqarput, ikaartaat orpimmut puttasumut apornermi kingorna umiusimassasoq.