Inatsit unioqqutinnginnerarpaat

- Arnat angutillu naligiissitaanissaat pillugu inatsit unioqqutinneqanngilaq, Lars L. Alting, Namminersornerullutik Oqartussat Ingerlatseqatigiiffinnut Allattoqarfianneersoq taama oqarpoq.

KNI-p siulersuisuinut ilaasortat arnat marluk angutinit taarserneqareersullu, Kalaallit Nunaanni Naligiissitaanissamut Siunnersuisoqatigiit akerlianik radioaviisimut ippassaq oqariartuuteqaraluarput, Lars L. Altingili allatut isumaqarpoq:

- KNI-p siulersuisuinut ilaasortassanik toqqaanermi arnat angutillu naligiissitaanissaat pillugu inatsit unioqqutinneqarsimanissaannut Kalaallit Nunaanni Naligiissitaanissamut Siunnersuisoqatigiit oqariartuutaat akuersaarnartinngilarput, Lars L. Alting, Ingerlatseqatigiiffinnut Allattoqarfimmi fuldmægtiigitut atorfilik oqarpoq.

Pisinnaasat toqqammavigalugit toqqaasoqarsimasoq Lars L. Altingip aamma oqaatigaa, naligiissitaanissamullu inatsimmi paragrafit ilaannut oqaaseqaat innersuussutigalugu.

Arnat angutillu naligiissitaanissaat pillugu inatsisartut inatsisaat 2003-meersoq ilisimalluaritsik Ingerlatseqatigiiffinnut Allattoqarfiup oqaatigaa.

- Suliffeqarfimmut KNI-mut paasisimasaqarneri tunngavigalugit, suliffeqarfiutilik Vagn Andersen, Nunaoil-imilu ingerlatsisoq Jan H. Pedersen siulersuisunut ilaasortassatut toqqarneqarput, allamik naamik. Suiaassuseq tunngavigalugu uani toqqaasoqanngilaq, Lars L. Alting oqarpoq.

Ingerlatseqatigiiffinnut allattoqarfiup ileqqorissaarneq tunngavigalugu toqqaanertik erseqqissaatigaa.

KNI-mi ilaasortat qulingiluaapput, taakkunanngalu angutit arfineq-marluullutik, arnallu marluullutik.

Demokraatit inatsisartuni ilaasortaatitaat, Lene Knüppel, KNI-ip siulersuisuinut toqqaasoqarneranut naalakkersuisunut apeqquteqaateqarpoq.

Naalakkersuisut naligiissitaanissamut politikkeqarnersut apeqqutinut ilaapput, KNI-milu siulittaasuusoq Simon Olsen taarserneqarnissaa aamma ujartorneqarluni.