- Ilaasortaasugut pingasuinnaavugut arfineq-marluusussaalluta. Taamaalillutalu sulinerput ilaatigut inuttassaaleqinermik tunngaveqartumik pisarnermiit arriinnerulaamik ingerlavoq martsimiit, tassa ukioq affanngulerpaa aalajangiiffigineqarnissatsinnut utaqqilluta, Ineqi Kielsen (S) oqarpoq.Assi: Maasi Pedersen/KNR

Inatsit tunngaviusussaq pillugu Isumalioqatigiissitaq ilaasortassaaleqivoq: Naalakkersuisut utaqqikatappagut

Isumalioqatigiissitami ilaasortat maanna pingasuinnaapput, taakku arfineq-marluusussaagaluarput. Múte B. Egedep allannguuteqartoqangajalernerarpaa.

Ilaasortat arfineq-marluugaluarlutik maanna pingasuinnaapput.

Inatsit tunngaviusussaq pillugu isumalioqatigiissitaq Naalakkersuisut Inatsisartullu apriilimi allanngornerata kingunerisaanik kalluarneqarpoq.

Inatsisartunummi qinersinerup inatsit tunngaviusussaq pillugu isumaqatigiissitap imarisaa allanngortippaa.

Siullertut Suleqatigiissitsisut Nunatta Qitornaalu Inatsisartunut qinerneqanngillat. Tamatuma saniatigut Atassut isumalioqatigiissitamit siorna anivoq.

Naleqqallu isumalioqatigiissitami ilaasortaatitaa, Pele Broberg naalakkersuisunngorami isumalioqatigiissitamiissinnaajunnaarpoq.

Inatsit tunngaviusussaq pillugu Isumalioqatigiissitaq
 

  • Nunatsinni namminerisamik tunngaviusumik inatsiseqarnissaq Inatsisartuni siullerpaamik 2007-imi qaqinneqarlunilu oqallisigineqarpoq.

 

  • Ukiut qulingiluat qaangiuttut apeqqut qaqinneqaqqippoq, tassanilu Inatsisartunut aalajangigassatut siunnersuutigineqarluni. Nunatsinni inatsit tunngaviusoq pillugu isumalioqatigiissitaliornissaq taperserneqarpoq.

 

  • Taamaammat Naalakkersuisut Tunngaviusumik Inatsisissaq pillugu Isumalioqatigiissitaq 2017-imi apriilip ulluisa 27-anni pilersippaat.
     
  • Tunngaviusumik inatsimmik "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" suliaqartoqassaaq.
  • Siunnersuutit marluk tamanut tusarniaassutigineqassapput.
     
  • Tunngaviusumik inatsisissatut siunnersuut pilersaarut malillugu naalakkersuisunut ukiut ataaseq qaangiuppat tunniunneqassaaq.

    Paasissutissarsiffik: tunngavik.gl

Isumalioqatigiissitami ilaasortat maanna pingasuinnaapput, naak siusinnerusukkut arfineq-marluugaluarlutik.

Taakkulu Inatsisartunut immikkut ittumik qinersisoqarnissaata marsimi suaarutigineqarneraniilli pingasuinnaalerput.

AAMMA ATUARUK Inatsit tunngaviusoq pillugu ataatsimiititaliaq: Takujuminaassinnaagaluartoq sulingaatsiarsimaqaagut

Inatsit tunngaviusussaq pillugu Isumalioqatigiissitap siulittaasuata, ineqi Kielsenip (S) ikippallaarnertik qatsullunikku oqaatigaa.

Taassuma isumalioqatigiissitamilu ilaasortat sinnerisa Naalakkersuisut ilaasortassanik toqqaanissaat utaqqivaat.

- Massakkut sulinerput kalluarneqaqqavoq, Ineqi Kielsen oqarpoq.

- Ilaasortaasugut pingasuinnaavugut arfineq-marluusussaalluta. Taamaalillutalu sulinerput ilaatigut inuttassaaleqinermik tunngaveqartumik pisarnermiit arriinnerulaamik ingerlavoq martsimiit, tassa ukioq affanngulerpaa aalajangiiffigineqarnissatsinnut utaqqilluta.

Isumalioqatigiissitaq naapertorlugu Naalakkersuisuni siuttuusut tassa Inuit Ataqatigiit ilaasortassanik nutaanik toqqaasussaapput.

Naalakkersuisullu isumalioqatigiissitap suut suliarissanerai aamma aalajangertussaallugu.

- Kommissoriassarput, tassa suliakkiut taanna allannguuteqassanersoq utaqqimaarparput. Pilersaarusiornitsinnut arriillisaataasimasoq ilagivaat aalajangiisoqarnissaanut utaqqinerput, Ineqi Kielsen oqarpoq.

Múte B. Egede: Inatsisartut ilaasortanik taasissapput

Nutaanillu ilaasortartaartoqangajalersoq, Múte B. Egede (IA) oqarpoq.

Naalakkersuisut siulittaasuata, Múte B. Egedep (IA) Inatsit tunngaviusussaq pillugu isumalioqatigiissitami ilaasortaasanik toqqaanissaq Naalakkersuisut aasaanerata ingerlanerani sulissutigisimagaat Qanoruumut nassuiaatigaa.

- Massakkut sisamanngorpat Naalakkersuisunut qaqinneqassooq tassanilu akuereerineqariarpat Inatsisartunut ingerlateqqinneqarluni ilaasortat toqqarneqarnerat pisinnaanngussooq, Múte B. Egede oqarpoq.

Tamanna qaammatip matuma naanerani tulliataluunniit aallartinnerani pisinnaavoq.

AAMMA ATUARUK - Tunngaviusumik inatsisissaq pillugu isumalioqatigiissitaq sulerinersoq naluara. Iphonemilli eqquerusuppunga

Naalakkersuisut Isumalioqatigiissitami ilaasortat amerlassusaannik arfineq-marlunnit tallimanut aamma naleqqussaasimasut Múte B. Egedep oqaatigaa.

Inatsit tunngaviusussaq pillugu Isumalioqatigiissitap inatsit tunngaviusussap ilulissaa pingaarnertut suli suliassarigaa, 2022-llu naajartornerata tungaanut isumaliutissiissusiortussaasoq, ilanngullugu oqaatigaa.

- Tunngaviusumik suliakkiunneqarsimasut taakkua allanngortingaanngilagut. Ataatsimiitsitaliarsuup suliassaa pingaarneq tassaassaaq missingiummik inatsisissatut suliaqarneq aammalu isumaliutissiinissaq.

Inatsit tunngaviusussaq pillugu Isumalioqatigiissitap suliaqarnini 2022-p naanertornerani naammassigaa attatiinnarpaa.

- Allatut aalajangertoqanngippat 2022-p naanissaata tungaanut sulineq taamatut iluseqassasoq naammassinninnissarlu uagut pingaartutut isigaarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat