Nunatsinni inatsisissatut siunnersuutip assinga Danmarkimi folketingimi amerlanerussuteqartunit itigartitsissutigineqarpoq.Assi: KNR

Inatsit nukingiussaq: Politiit angerlarsimaffinnut akuersissuteqaratik isersinnaalissapput

Politiit angerlarsimaffinnut akuersissummik peqqaanngikkaluarlutik isersinnaanngorneri, Naalakkersuisunit apriilip aallaqqaataanit taasissutigitinneqareerpat atuutilersinniarneqarpoq.

Inigisaq ajortumitsaaliugassaalluinnassaaq.

Tamanna tunngaviusumik inatsimmi allassimavoq. Imalu paasineqartariaqarluni, assersuutigalugu nappaammik tunillaassuuttumik napparsimasumik pasitsaassisoqartillugu, politiit oqartussallu allat eqqartuussivinnit akuersissuteqaqqaaratik angerlarsimaffinnut iseqqusaanngitsut. Tamannali aatsaat pisinnaalluni eqqartuussisoq isumaqarpat inatsisinik unioqqutitsisoqanngitsoq.

Inatsilli tamanna Naalakkersuisunit pingasunngornermiit piaarnerpaamik atuutilersussamik allanngortinniarneqarpoq, tassa nappaammik tunillaassuuttumik napparsimasumik pasitsaassisoqartillugu poliitiit eqqartuussisumit akuersissuteqaqqaanngikkaluarlutik angerlarsimaffinnut isersinnaalissallutik.

Inatsisinut atuutsitsinermut Naalakkersuisoq, Martha Abelsen naapertorlugu, inatsimmik allannguinissamut tunngavilersuutigineqarpoq, coronavirusip tunillaassuulluni siaruaatinnginnissaa anguniarlugu allannguisariaqalerneq.

- Nappaatit tuniluuttut pinaveersaartinnissaat qanorlu iliorluni pinaveersaartitsinerup eqquutsinneqarnissaa pillugu taamatut isikkulimmik saqqummiivugut, Martha Abelsen oqarpoq.

AAMMA ATUARUK Tvangsbehandling og forbud: Det skal Inatsisartut stemme om

Inatsisinik sukaterinissat pisariaqartinneqarneri aammali pisinnaatitaaffiit arlallit eqqarsaatigalugit tamassuma mianersorluni suliarineqarnissaat ajornakusoorsinnaalluartut, Inuit Pisinnaatitaaffii pillugit Siunnersuisoqatigiinnit paasilluarneqarpoq ilaatigut peqqinnissaq kiffaanngissuseqarlunilu inuuneq eqqarsaatigalugit.

- Politikkikkut taamatut sukateriniartoqarnera paasilluarsinnaavarput, soorunami nappaalanersuaqarnerata nalaani tamanna pisariaqarpoq. Kisianni tassa eqqaasitsissutigerusupparput peqqissaartumik tamanna suliarineqartariaqarmat tassami kiffaanngissuseqarluni inuuneq pisinnaatitaaffiuvoq aamma angerlarsimaffiit eqqarsaatigalugit, Inuit Pisinnaatitaaffii pillugit Siunnersuisoqatigiit siulittaasuat, Sara Olsvig oqarpoq.

Siunnersuut ersarissumik allaqqanngitsoq

Politiit oqartussallu allat eqqartuussisunit akuersissummik peqaqqaaratik angerlarsimaffinnut isersinnaalernissaat pillugu Danmarkimi folketingimi siunnersuutigineqaraluartoq, ilaasortanit amerlanerussuteqartunit itigartitsissutigineqarpoq isumaqaramik pisinnaatitaaffinnik tamanna qaangiineruvallaartoq.

- Maluginiarparput Danmarkimi inatsisip suliarineqarnerani folketingimi amerlanerussuteqartut tamanna piumanagu itigartitsissutigigaat. Tamannalu maani nunatsinni politikerinit eqqumaffigineqarnissaa taarusupparput, Sara Olsvig oqarpoq.

Inatsisip nukinginnartumik allanngortinneqarallarnissaanut atatillugu naalakkersuisut allattorsimaffiliorsimapput, angerlarsimaffinnulli isersinnaatitaanermut tunngasoq ataasinnguamilluunniit eqqaaneqanngilaq. Tamannalu eqqarsarnartoqartinneqarpoq.

- Oqartussat eqqartuussivinnit akuersissuteqaqqaaratik angerlarsimaffinnut isersinnaalernerannut siunnersuut annertungaatsiarpoq, taamaattumik allattorsimaffimmi pingaarnertut allaqqannginnera tupigisuutigilaarparput, Inuit Pisinnaatitaaffii pillugit Siunnersuisoqatigiit siulittaasuat, Sara Olsvig oqarpoq.

Inatsisissatut siunnersuut aappaagumut decembarip 31-annut atuuttussaq Inatsisartuni pingasunngorpat apriilip aallaqqaataani oqallisigineqassaaq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7448
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 18-iat 2020 nal. 10:45