Inatsit akerleralugu Savalimmiuni politikeri tunuarpoq
Savalimmiuni Lagtinge-p qanittukkut inatsisitigut atuutilertussanngortitaa tassalu suiaassuseqatigiillutik atoqatigiittartut inatsisitigut nikanarsarneqannginnissaannik imaqartoq, maanna politikkikkut malitseqartinneqalerpoq.
Savalimmiuni politikkikkut nuimasut ilaat partiimit Republikanerineersoq siusinnerusukkullu naalakkersuinermi aningaasaqarnermut siuttuusimasoq Karsten Hansen nalunaarpoq, suiaassuseqatigiillutik atoqatigiittartut inatsisitigut illersugaalernissaannut akerliunini takutinniarlugu partiiminiit tunuarluni.
Taamatuttaaq Sambandspartiit allattaata – Helgi Abrahamsenip, parteeqammi ilaasa inatsisissaq taanna akuersaarmassuk kamaatigeqaa, ilaatigut taanna avammut oqarpoq, parteeqatini Lagtinge-miittut assut pakatsiffigisimagini ”meeraanerminiit upperisaminut ilitsoqqussaminut inuunerminilu tunngavigisaminut assortuisumik parteeqatini taasisimanerarlugit”
Tallimanngormat Savalimmiuni Lagtingemi amerlanerussuteqalaartumik suisaassuseqatigiillutik atoqatigiittartut nikassarneqannginnissaat pillugu taasissutigineqarpoq.
Ilaasortat akornanni 17-t akuersaarput 15-illu akerliullutik, taamaalilluni suiaassuseqatigiillutik atoqatigiittartut ammit qalipaataanik kiisalu allatut upperisalinnut immikkoortitsisoqannginnissaatuulli immikkoortinneqarsinnaajunnaarput. Soorluttaaq inatsit tamanna nunani Europami avannarlerniittuni atorneqareersoq.
