Inatsisitigut unioqqutitsilluni aalisartoqarpoq!

Aalisarnermut Naalakkersuisunngortussaq suliassaqassagunaqaaq, Namminersorneq pillugu pisortaqarfiup aalisarnermi peqquserluttoqartarsimanera pillugu nalunaarusiaa qulaaqqammeramiuk.

- Kukkusumik oqimaassusiliinerit nalunaarutigineqartarsimapput.

- Pisassarititanik peqquserluttoqartarsimavoq.

- Kukkusumik raajanut akitsuusiisoqartarsimavoq.

- Avammut tunisat eqqunngitsumik naatsorsuusiorneqartarsimallutittaaq.

Ilaatigut tamakkuupput nunatsinni aalisarnerup iluani pinartumik pisoqarneranik nalunaarusiami allanneqarsimasut.

Nalunaarusiaq qulequtaqartinneqartoq: ”Inatsisinik unioqqutitsilluni aalisartoqarneranik unnerluussut”, apriilimi 2005-imi suliarineqarsimavoq – sunalu peqqutaasimanersoq suli ilisimanngisatsinnik avammut saqqummiunneqarsimanngilaq. Nalunaarusiaq Namminersorneq pillugu pisortaqarfiup, kiisalu Aalisariutini Kilisaatinilu Inuttat Peqatigiiffigisimasaata A.K.I.P – ip aammalu SIK-p peqatigiillutik suliarisimavaat.

A.K.I.P-ip siulittaasuata tulliata Lars Fly-p sooq nalunaarusiamik taama ittumik suliaqarsimanertik ima nassuiarpaa.

- Taama nalunaarusiortariaqarsimavugut, ilaasortatta uagullu Peqatigiiffittut ilisimasagut misilittakkagullu tunngavigalugit utaqqiinnaratalu iliuuseqartariaqarsorisimavugut. Nunatta aningaasarsiornera inuiaqatigiinnut tamanut iluaqutaasinnaanngorlugu aaqqissuunneqassappat arlaatigut iliuuseqartoqartariaqarsorigatsigu.

Lars Fly aamma oqarpoq, Namminersorneq pillugu pisortaqarfiup misissuinissamut suleqatiserisimagaatsik, taanna qalleqqissaavoq, ukiuni arlalinni Aalisarnermut pisortaqarfimmut ajornartorsiut tamanna pillugu saaffiginnittuartarsimanitik akissuteqarfigineqanngisaannarsimasut.

Nalunaarusiaq atuaraanni inerniliinermi aammattaaq erseqqissumik allassimavoq Aalisarnermi inuussutissarsiornermi peqquserluttoqartarsimaqisoq, ilaatigut ima allassimasoqarpoq:

” Inuiaqatigiit pigisaannik eqqarsarluaqqaarnani atuisoqarsimavoq, ajornerpaaffianilu inuiaqatigiinni aningaasatigut isertinneqartussaagaluit pingaarutillit akornuserneqarsimallutik”.

Nalunaarusiap naggataani erseqqissarneqarportaaq raajanik avammut niuerneq pissusissamisuunngitsumik ingerlanneqartoq, tamannalu nunatta avammut niuernerata isigineqaranut innarliisinnaasoq.

Taamatuttaaq erseqqissarneqarluni ajornartorsiummut tamatumunnga unnerluussut tamanna pinartutut isigalugu misissuiffigineqartariaqartoq. Tassami nalunaarusiaq tamanna ukiup affaata matuma siornali naammassineqareeraluartoq suli maannamut iliuuseqarfigineqarsimanngimmat.

Nalunaarusiap isertuunneqartup itinerusumik nassuiaatissarsinissaa, kiisalu suna pillugu taama isertuussaatiginera radioaviisimiit misissorniarneqalersaarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat