Inatsisitigut pisussaaffiliisumik isumaqatigiissut Obamap ilimaginngilaa
- Piffissaarutereerpugut, silap pissusaa pillugu inatsisitigut pisussaaffiliisumik isumaqatigiissuteqarnissatsinnut angumersisinnaanngilagut, Singaporemi ippassaq ataatsimiinnerup kingorna Obama, tuluit aviisiannut The Guardianimut oqarpoq.
Ataatsimeeqatiginnermi naalagaaffiit siuttui 19-it peqataapput, taakkununnga ilaallutik Danmarkimi ministeriuneq Lars Løkke Rasmussen aamma Kinami præsidenti Hu Jintao.
Inatsisitigut pisussaaffiliisumik isumaqatigiissuteqarnissap aappaagumut kinguartinneqarnissaa, taamalu Københavnimi ataatsimeersuarnissap, inatsisitigut pisussaaffiliilluni isumaqatigiissuteqarnissaq anguniarlugu ataatsimeersuarnerit arlallit ilagissagaat, Obamap kajumissaarutigaa. Taamaalilluni Obamap taamatut nalunaaruteqarnini aalajangiusimaannassappagu, CO2-mik mingutsitsinerup millisarnissaanik anguniagaqarluni aalajangiussat tamarmik, aappaagumut kinguartinneqassapput.
Lars Løkke Rasmussen sapaatip akunnerata naanerani suliniaqatigiiffinnit naalakkersuisunut attuumassuteqanngitsunit arlalinnit isornartorsiorneqarpoq. Taakku isumaqarput silap pissusaa pillugu Københavnimi ataatsimeersuarnermi inatsisitigut pisussaaffiliisumik isumaqatigiissuteqarnissaq ministeriunerup anguniarunnaarmagu, tamanna taassuma ilungersuuteqannginneranut takussutissaasoq.