Inatsisitigut Ataataqanngitsut suliniutaat Naalakkersuisut misissuiviginialerpaat

- Naalakkersuisut assut tikilluaqquvaatigut, naapikkumagatsigik qujallutik, suliaq imaannaanngitsuummat, aamma qanorpiaq iliuuseqarfigineqarsinnaanersoq tamatta nalugatsigu apuussinitsinni tikilluaqquvaatigut. Imatut neriorsuuteqarput misissueqqaartoqartariaqartoq, inatsisit atuuttut qanorpiaq isummerfigineqarsinnaanersut - tassa ersarissumik isumaqatigiissutigiinnarparput Naalakkersuisut tassaajumaartut tulliani uatsinnut attaviginnittut, tassa oqaloqatiginninnivut taamaalilluta aallartisarpavut, Tida Ravn oqarpoq.

Sunamita pingaartinnerussavaat?

- Uatsinnut pingaaruteqartorujussuuvoq tamanit paasineqaleriaratta inatsisit avataatigut inissisimanerput tamaanga killeqartariaqartoq, arlaatigut aaqqiissutissamik ujartuisoqarnissaa pingaarnerpaatipparput, matorpassuit maannamut suli matoqqasut ammartikkusukkatsigik, naalakkersuisullu suleqataajumanerat uagutsinnut pingaarutilerujussuuvoq. Kisianni Inatsisartut inatsisit atortinneqarnerannut ilaasortat aamma taama nipeqarlutik apuussinitsinni tikilluaqqusinikuupput, misissuisoqarnissaanut aamma isumaqataallutik, naak annerusumik neriorsuuteqarsinnaanngikkaluarlutik. Eqqaamasassaat aana, naalagaaffiup ataani pisussaaffiit akisussaaffiillu ulloq manna tikillugu suli attanneqarmata, tassa ingerlaannartumik, toqqaannartumik uagut nunatsinni oqartussaaffitsinnut qanoq-iliuuseqaqqusisinnaanerput killeqarpoq ugguuna: tappavunga naalagaaffiup naalakkersuisuinut apuussinissamik, suliamut aaqqeequtaasinnaasumik ilallugu arlaatigut pinerat, tamanna pissusissamisoorsoraarput, Tida Ravn oqarpoq.

Inatsisitigut Ataaqanngitsut peqatigiiffiat suli pilersinneqanngilaq, kikkulluunniilli tapersersuerusuttut Nuummi Blok 10-mi, siusinnerusukkut Natsiluaasimasumut, pingasunngorpat unnukkut nalunaaqutaq arfineq-marluniit qulingiluat tungaanut ataatsimiigiarsinnaapput.