Inatsisitigut ataataqanngitsut qulaajaaffigineqalerput
Tamanna isumaqatigiissutigineqarpoq naalagaaffeqatigiit ataatsimiinneranni Skagenimi ippassaq ataatsimiinermi.
Naalakkersuisut siulittaasuat Kuupik Kleist aamma danskit statsministeriat isumaqatigiipput, inatsitigut ataataqanngitsut, ataatamik kinaaneranik paasiniaasinnaannginnerannik kingornussisinnaannginnerannillu, danskit inatsisiliorsimanerat qulaajarneqassasoq.
Uersakkat 1963 sioqqullugu nunatta kitaani inunngortut aamma 1974 sioqqullugu tunumi avannaanilu inunngortut kina ataataginerlugu paasiniiaasinnaanerat, kingornussisinnaatitaanerannillu mattussaanerat, danskit inatsisiliorneratigut periarfissaqartinneqanngillat.
Danskit taamatut inatsisiliorsimanerannut pineqartut paasitinneqarnissaat pisariaqartoq, Kuupik Kleistip oqaatigaa.
Inatsitigut ataataqanngitsut inatsitigut pisinnaatitaaffinnik periarfissaqartitaanissaat, danskit naalakkersuisorisimasaannit itigartitsissutigineqartarpoq. Danskit ministeriunerata Lars Løkke Rasmussenip qulaajaanissamik neriorsuinera oqaluttuarisaanermi pisut annertuut ilaattut Naalakkersuisut siulittaasuata Kuupik Kleistip taavaa.
Naalagaaffeqatigiit ataatsimiinneranni ilagiit kalaallit Danmarkimi najuqartut sullinneqarnerat oqaluuserineqartut aamma ilagaat. Danmarkimi kalaallit palaseqaannarnissaat Kuupik Kleistip qulakkeerlugu oqaatigereernikuuaa, qanorpiarli aaqqiisoqassanersoq ataatsimiinermi eqqaaneqarpoq, tamannalu ukioq naatinnagu paasineqassasoq, Naalakkersuisut siulittaasuat Kuupik Kleist oqarpoq.
