Inatsisitigut ataataqanngitsut: Naalagaaffimmit taarsiivigineqarnissarput pissusissamisuuginnassaaq

Inatsisitigut ataataqanngitsut pillugit suliaq Inatsisartuni ullumi oqaluuserineqarmat, partiit tamarluinnarmik piumasaraat Naalakkersuisut Qallunaat naalakkersuisuinut piumasarissagaat inatsisitigut ataataqanngitsut, kingornusinissaminnullu kingusinaareersimasut, taarsiivigineqarnissaat.
oktobarip 01-at 2013 17:19

Inatsisitigut ataataqanngitsut peqatigiiffiat ukiuni sisamani sulipilooreerlutik, Nunatsinni politikerit partiillu tamarluinnarmik isumaqatigiillutik tapersersuineri, peqatigiiffimmi siulittaasup, Tina Ravn qamuuna attortissimaaqisup siullermik ima oqaatigaa.

- Inatsisartuni politikerit oqallinnerat tusarnaareerlugu anillappunga assut pikkusullunga, Tida Ravn oqarpoq.

Inatsiartuni partiit pisumut oqaaseqartuisa tapersersuinertik ima tamanut tusarliuppaat, siullermik Siumup oqaaseqartua Kristian Jeremiassen ima oqaluttarfikkut oqarpoq.

- Kingornussisinnaanermut suliat naammassereersimasut kinguneqartippaat, meeqqat pineqartut kingornussinngitsoornerannik, tamannali Siumumit naammagiinnarnianngilarput. Piumasaraarput inuit pineqartut pillugit Nunatsinni Naalakkersusiut Qallunaat Naalakkersuisuinut piumasaqassasut, inatsisitigut ataataqanngitsut taarsiivigineqarnissaannik, Kristian Jeremiassen oqarpoq.

Inuit Ataqatigiinniit Sara Olsvig ima oqaaseqarluni.

- Kalaallit Nunaanni innuttaasorpaalussuit taamatut ilugersunartumik innarligaanerat naalagaaffimmi oqartussaasut ilisimaarisimagaluarpaat, taamaattoq naqqiinissat kinguarsagaasimalluni. Inuit taakku inuttut tunngaviusumik pisinnaatitaaffiisa akuerineqarnissaat maanna piffissanngorluinnarpoq, Sara Olsvig oqarpoq.

Atassutip oqaaseqartua, Gerhardt Petersen, Naalakkersuisunut ima kaammattuuteqarpoq.

- Atassummiit Naalakkersuisut kaammattussavagut, sulissutigeqqulluugu Naalagaaffiup pisussaaffigisassaanik naapertuuttumik taamatut nalaataqarsimasut taarsiivigineqarnissaat danskit naalakkersuisuinut isumaqatigiinniutigeqqullugu, Gerhardt Petersen oqarpoq.

Inatsisitigut ataataqanngitsut politikerit saqqummiussaannut tusarnaareerlutik siulittaaasoq, Tida Ravn nuannaaqisoq ima qisuariarpoq.

- Tassa paasinarpoq qinikkat uangutsinnut annertuumik isumaqataasut. Politikerit tappiffigisimavaat uangut amigaatitut taakkartukkavut tassami ukiuni sisamani annertoorujussuarmik inatsisitigut ataataqanngitsut pillugit oqallittoqareerpoq, paasineqarnerpullu nuannaarutigigaarparput, Tida Ravn oqarpoq.

Naalagaaffik akisussaatinneqarluni inatisitigut ataataqanngitsunut, kingornussinissaminnullu kingusinaareersimasunut aningaasanik taarsiissuteqarnissaa partiinit tamanit piumasarineqartoq pillugu Tida Ravn ima oqarpoq.

- Kingornussisussaatitaanerput innarlerneqartussanngormat nuannarisimanngilarput. Tamaattumik iluaraara tamanna immikkut maanna aaqiiviginiarneqarmat Naalagaaffimmut isumaqatigiinniutigalugu. Kisianni tassa tamanna aatsaat paasinarsissaat Inatsisartuni aappassaaneerneqareerpat, Inatsisitigut ataataqanngitsut siulittaasuat, Tida Ravn taama oqarpoq.