Inatsisitigut ataataqanngitsut kiisami aaqqiivigineqalerunarput

Inatsisitigut ataataqanngitsut inatsisitigut inissisimanerisa erseqqissaavigineqarnissaannut naalagaaffiup inatsisaata allannguutissaanut siunnersuut, Inatsisartuni ullumi siullermeerlugu eqqartorneqassaaq. Siunnersuummik saqqummiussissalluni Naalakkersuisut siulittaasuat, Aleqa Hammond.
Aleqa Hammond
oktobarip 01-at 2013 10:13

Inatsisitigut ataataqanngitsut peqatigiiffiani siulittaasup, Tida Ravnip nuannaarutigaa, inatsisissatut allannguutitut siunnersuut kiisami oqaluuserineqartussanngormat naak ukiut 70-it kingusinaaraluartoq.

- Kiisami aaqqiiviginiarneqalerpugut naak ukiut 70-it kingusinaaraluartumik. Tamannalu nuannaarutigaarput, Tida Ravn oqarpoq.

Naalagaaffiup inatsisissaata allannguutissaanut siunnersuummi inatsisitigut ataataqanngitsut periarfissaqalissapput kina ataatarinerlugu paasissallugu aamma ataataminnit kingornussinissaminnut pisinnaatitaaffeqalernissaat anguneqassalluni. Kingornussassalli eqqarsaatigalugit, ataataasoq toqukkut qimagutereersimappat kingornussassallu taassuma meeraanut agguaanneqareersimappata, Nunatsinni inatsisitigut ataataqanngitsut ilaqutartaaminnik qassiiliortitserusunngillat oqarlutik naalagaaffik tamanna pillugu aaqqiisariaqartoq.

- Taanna ilaqutartaatsinnut tutsikkusunngilarput. Isumaqarpunga naalagaaffiup sumiginnagaasimanini aallaavigalugu inatsisitigut ataataqanngitsut akiliiffigisariaqarai, tassami ilaqutartaatsinnut tutsinneqassagaluarpat tamanna aaqqiangiinngissutinik nutaanik pilersitsiinnassooq.

Inatsisitigut ataataqanngitsut siulittaasuat, Tida Ravn taama oqarpoq. Naalakkersuisut siulittaasuata, Aleqa Hammondip, Inatsisartut aalajangiiffigisassaattut siunnersuummik ullumi saqqumiussisussap, inatsisitigut ataataqanngitsut siulittaasuat, Tida Ravn isumaqatigaa oqarluni, naalagaaffik soorunami pisussaafeqartariaqartoq inatsimmik allannguinissaminnut.

- Isumaqarpunga pingaaruteqarluinnaartuusoq innuttaaqatitta ilaasa, inatsisitigut ataataqanngitsutut inissisimanerat kikkunnilluunniit nammanneqarsinnaanngitsoq. Taamaattumik naalagaaffik puisussaaffeqarpoq inatsisitigut ataataqanngitsut pillugit erseqqissaassuteqassalluni inatsisillu allanngortinneqarnissaanut siunnersuuteqartariaqarlutik.

Aleqa Hammondip ilanngullugu oqaatigaa, tamanna qangali utaqqisaq kiisami Inatsisartuni aalajangiiffifineqarluni oqallisigineqarnissaa qilanaaralugu imalu nangilluni oqarluni.

- Naalakkersuisut siulittaasuatut isumaqarpunga, Inatsisartut piumasaqaataat aallaavigalugit suliassama pingaarnerit ilagisariaqaraat, inatsiissap isumaqatigiinniutigineqaqqinnissaanik naalagaaffik oqariartuuteqassappat inatsisitigut ataataqanngitsut kingornussisussaatitaanngitsut taava oqariartuutigissavara, naalagaaffik tamatuminnga ammaassisariaqartoq minnerpaamillu naapertuilluarneq tunngavigalugu aaqqiisariaqartut, Naalakkersuisut siulittaasuat, Aleqa Hammond taama oqarpoq.

Inatsisartut aalajangiiffigisassaattut siunnersuummi aamma eqqartorneqassaaq, inatsisip atuutilernerata kingornatigut meeqqat inunngorsimasut, ataatassarsiorneqarneqarnerannilu aalajangiisoqarsimappat angut ataaseq arlallilluunniit meeqqamut akilersuisussanngortinneqarsimallutik, taava uersagaq periarfissaqalissammat ataatassarsiuinerup suliareqqinneqarnissaanut qinnuteqarnissaminut, suliassanngortitseqqinnermut piumasaqaatit naammassineqarsimanngikkaluarpataluunniit taamaaliortoqarsinnaassalluni.