Inatsisitigut ataataqanngistut Inuit Pisinnaatitaaffiisa Eqqartuussiviatigut suliakkiisinnaapput
Naak Folketingimit inatsit maanna allanngortinneqareeraluartoq, Inuit Pisinnaatitaaffii pillugit eqqartuussivimmut, Strassbourg-immiitumut tamanna suliakkiutigineqaraluarpat, Danmarki ajorsaratarsinnavoq.
Inatsisitigut ataataqanngitsut ataataat ququkkut qimagutereersimappata, soorlu amerlanerit taamaalereersut, kingornussassaallu agguaanneqareersimappata, taava kalaallit inatsisitigut ataataqanngitsut maanna kingornussisussaatitaanngillat.
- Naatsorsuutigineqarsinnaalluarpoq inatsisitigut ataataqanngitsut ilaasa, Danmarkip naalagaaffianit taarsiivigineqarnissaminnik eqqartuussivitsigoortitsinissaat, Inuit Pisinnaatitaaffii pillugit Institut-imi pisortap, Jonas Christoffersen-ip inatsit nutaaq atuareerlugulu taama oqarpoq.
Taassuma ilimagilluinnarpaa, inatsisitigut ataataqanngitsut eqqartuussivilersuussinissamik aallartitsigaluarpata, Danmarki taarsiinissamik pisussaaffilerneqassasoq. Tassami nunat allamiut tamassumunnga assigusumik eqqartuussivilersuussineranni taarsiivigineqartartut, Jonas Christoffersenip eqqaamaqquaa.
Nunatta Ilisimatusarfiani atorfillip, oqaluttuarisaanermik suliaqartup ph.d-llu, Jens Heinrich-ip, Nunatsinni inatsisitigut ataataqanngistut qanimut malinnavigai. Taassuma oqaatigaa, inatsisitigut ataataqanngitsut eqqartuussivilersuussinissamik suliaqalereersut.
- Pisoq tamanna Kalaallit Nunaanni malinnaavigineqarluarpoq, tassami kalaalerpassuit inatsisitigut ataataqanngitsut amerlalluinnaramik. Taakku pisariaqartitaat tassaaneruvoq meeqqatut ataatalittut akuerisaanissaq, soorunalumi aamma aningaasanik taarsiivigineqarnissaq taakku pisariaqartippaat, aviisimut JyllandsPostenimut Jens Heinrich oqarpoq.
Inatsisitigut ataataqanngitsut oqaaseqartartuata, Tida Ravn-ip aviisimut aamma naqissuserlugu oqaatigaa, ataatat toqukkut qimagutereersimasut kingornussiassaallu agguaanneqareersimasut pineqanngimmata, tassami ataataasup ilaqutaasa avissaartuutinnginnissaat pingaaruteqartutut isigigamikku.
- Danskinut meeqqanut uersakkanut assigusumik unagut pineqassasugut Danmarki neriorsuuteqarsimavoq, tassalu tassaniippoq immikkoortinneqartutut misigisimalernerput, Tida Ravn oqarpoq ilimaginerarlugulu kalaallit inatsisitigut ataataqanngitsut 5.000-it missaanniittut, Inuit Pisinnaatitaaffii pillugit Eqqartuussivimmut tunniussiumaartut aningaasanik taarsiivigineqarnissartit siunertaralugu.
