Inatsisit ukioq 2008-mi aatsaat allanngorneqassapput

Danskit Inatsisinik atortitsinermut ministeriata, Lene Espersenip, Inatsisinillu atortitsinermut naalakkersuisup, Aleqa Hammondip, ullumi naapeqatigiineranni neriorsuisoqanngilaq. Inatsisit allanngorneqassagunik siusinnerpaamik 2008-mi allanngorneqassapput.

Ullumilu naapissimanertik Aleqa Hammondip iluarisimaarpaa.

- Pingaartissimavara isaatigut isiginissaa, oqaloqatigerusullugu, aamma Kalaallit Nunaanni uagut ajornartorsiutitsinnut tunngatillugu apuussinissara pingaartissimavara. Tassungalu tunngatillugu paaserusussimavara ataatsimiititaliarsuup isumaliutissiissutaata innersuussutaasa pilersinneqarnissaannut tunngatillugu: Folketingimi qaqugu oqaluuserineqarniarpa? Qaqugu akuerineqassava? Aningaasanut inatsimmik isumaqatigiinniuteqalerpata, qaqugu taanna pissava? Taavalu aamma 2008-mi aatsaat tamanna siunnersuutigineqassappat paaserusuppara 2008-p tungaanut utaqqiisaa Danmarkip inatsisinik atortitsinermut ministeria suniarnersoq.

- Piffissami kingullermi nunatsinni eqqartuussiveqarnermi atugassarititaasut Danmarkimi nutaarsiassaqartitsivinnit sammineqartut pillugit Ilaqutariinermut inatsisinillu atortitsinermut naalakkersuisoq Aleqa Hammond taama oqarpoq.

Nunatsinni meeqqanik atornerluisimasutut pineqaatissineqarsimasup inuiaqatigiit akornanniitinneqarnera, pineqaatissinneqarsimasunullu inissiissarfiit ulikkaaqqasut, aviisip Politikenip sapaatiummat saqqummiuppai.

Aviisimilu allami, Jyllands-Postemi, nunaqqatitta Herstedvesterimiittut atugarisaat aamma allaaserineqaqattaarput.

Eqqartuussiveqarneq pillugu ataatsimiititaliarsuup isumaliuutissiissutaat Folketingimi ukiaru eqqartorneqassapput. Angusaqarluartoqassappat inatsisissatut siunnersuutit 2008-mi atuutilissapput.

Pitinnagilli Inatsisinik atortitsinermut ministeri Lene Espersen nunatsinnukassaaq.

Nunatsinnukartussaavoq aggustimi, aggustimilu nunatsinnukarnerminut atatillugu erseqqarinnerusumik akissuteqarfigisinnaassavaatigut. Isumaqarpunga taanna namminersisamik alloriarnerusoq angisooq aammalu neriunartoq aaqqiissuteqarnissatsinnut suleqatigiinnitsigut suliassaq aallartissammat.

-Isumaqarpunga pingaartuteqarluinnartuusoq uagut aalajangiusimassagipput: Aaqqiissutissaq ilivitsoq aammalu isumaliutissiissutip innersuussutaa minnerpaaffissaanik nunatsinnut atugassarititaasut aaqqiiffiginissaat.

Aleqa Hammond oqarpoq.