Inatsisit qallunaatuinnaq allaqqasut

Inatsisit nutserneqarsimannginneat sakkortuumik isornartorsiorneqarpoq, ilaatigut Nunatta Eqqartuussisuuneranit Søren Søndergaard Hansenimit.

- Taama sulisoqarsinnanera paasiuminaappoq. Inuk inatsisinik unioqqutitsisimasutut eqqartuuneqassaguni, inatsisit suut inuiaqatigiinnit atuunnersut pulaffiginissaannut periarfissaqaqqaartariqarpoq, Nunatta eqqatuussisuunera Søren Søndergaard Hansen taama oqarpoq.

- Inuiaqatigiinni pisortatigoortumik kalaallisut oqaaseqarfiusumi, inatsisit atuuttuulersussat qallunaatut allannerisa Lovtidendemi saqqummersinneqarnerat ilutigalugu, kalaallisut nutsernerat saqqummersinneqarneq ajormat, qanoq oqassalluniluunniit nalunarpoq. Kisianni eqqortuunngilaq,  Søren Søndergaard Hansen taama oqarpoq.

KNR-ip kisitsinera naapertorlugu, inatsisit 20-nit amerlanerit nalunaarutillu 100-nit amerlanerit nutserneqarsimanngillat. Assersuutigalugu naalagaaffimmit akiliunneqarluni eqqartuussissuserisoqarsinnaaneq pillugu nalunaarut kalaallisuunngorlugu pissarsiarineqarsinnaanngilaq.

-  Tamatuma ilaatigut kingunerisinnaavaa, inatsisit pasinngitsoornerinik peqquteqartumik unioqqutitsisoqartoq. Aamma kingunerisinnaavaa, inatsisit aqqutissiuussinnerusut, soorlu naalagaaffimmit akiliunneqarluni eqqartuussissuserisoqarsinnaaneq pillugu nalunaarutitut ittut innuttaasunit ilisimaneqanngitsoornerat,  Søren Søndergaard Hansen taama oqarpoq.

Inatsisit nutserneqarsimannginenrat aamma Eqqartuussisut peqatigiiffianni isorineqarpoq.

- Eqqartuussisut peqatigiiffiata tupigusuutigaa kalaallit oqaasii salliutinneqanngimmata tassami folketingip inatsisiliai aamma nalunaatutit kalaallisuumut nutserneqartarsimanngillat atuutilernissaat sioqqullugu. Pingaartumik Kalaallit Nunaanni namminersorneq atulereersoq eqqarsaatigalugu tamanna ajorluinnarpoq, eqqartuussisut peqatigiiffianni siulittaasup tullia Eleonora Steenholdt taama oqarpoq.

Taanna oqarpoq naatsorsuutigineqarsinnaanngitsoq inatsisit ilisimanngisat malinnissaat.

- Tamanna paatsuugassaanngivippoq. Kiammi inatsit Spaniamiusoortoq imaluunniit Japanimiusoortoq paasinngisaq malissinnaammagu. Tamanna iluatsissinnaanngilaq, taama oqarpoq.

Taamaammat inuit inatsisit paasinngisatik toqqammavigalugit eqqartuunneqaratarsinaanerat mianersoqqussutigaa pissutit taamaatsillugit eqqartuussinermi paatsuuisoqarsinnaammat.

Folketingip inatsisai nlunaarutillu nutseriikkat 2008 sioqqullugu Nalunaarutitigut saqqummertarput. Kisianni Nalunaarutit 2008-mi atorunnaarsinneqarput, naalagaaffiullu sinniisaata tamanna suliasarilerpaa, inatsisit nutseriikkat nittartakkamigut saqqummersissalugit. Statsministeriaqarfik taama ilisimatitsivoq.
Taamaaliornikkut inatsisit pissarsiariuminarsarniarneqarput, illua tungerluinnaanilli pisoqarpoq. Inatsip kalaallisuunngortinneranik ataatsimilluunniit Naalagaaffiup sinnisaata nittartagaani ullumi siumugassaasoqanngimmat.