Inatsisit maleqqissaarneqarput

Ineqarnermut pisortaqarfiup nalunaarusiaa Palle Christiansenip Demokratininngaanneersup iluarisimaanngilaa.

Nalunaarusiami oqaatigineqarpoq, attartortumiit illunik piginnittunngorsimasut inatsisit maleqqissaarlugit ingerlanneqarsimasoq. Ineqarnermut pisortaqarfiup imminut misissuiffigisimanera uppernarsaatititut atorsinnaanngitsoq, attartornermiit piginnittunngornermut aaqqissuussisimanernut uparuaanerpaasartoq, Palle Christiansen, isumaqarpoq:

- Tupiginngilara ineqarnermut pisortaqarfiup imminut misissuiffiginermini, ajortussaqanngitsutut imminut nalilersimammat. Isumaga malillugu imminut misissuiffigineruvoq. Taamaammat isumaqarpunga, ineqarnermut pisortaqarfimmut attuumassuteqanngitsoq misissuisussaasimagaluartoq. Misissuinermi una attuumassuteqanngitsumit misissuinerunngilaq, Palle Christiansen oqarpoq nangillunilu: - Misissuisimaneq una imminut misissuiffigineruvoq, taamaammallu taamatut inerneqarpoq.

Ineqarnermut pisortaqarfik isumaqaraluartoq attartortuunermiit illunik piginnittunngorsimanerit inatsisit malillugit ingerlanneqarsimasut, taamaattoq aamma nalunaarusiami allaqqasoqarpoq naleqqutinngitsumik pisoqarsimasoq. Tassalu Nuummi illut tallimat tunineqarsimanerini illut nalingisa qaavatigut 1 millioni koruuninik sipaarnertalimmik illunik tunisisoqarsimammat.