Inatsisissatut siunnersuut naammagineqanngilaq

Naalakkersuisut Ilisimatusarfik pillugu inatsisissatut siunnersuutaat Ilisimatusarfimmit illuatungilerneqarpoq.
Allattoq Elisa Isaksen
oktobarip 04-at 2007 07:40

Inatsisissatut siunnersuut tunuarteriarlugu ukiuni tallimani arfinilinniluunniit atuukkallartussamik inatsisiliortoqarnissaa Ilisimatusarfiup piumasaraa. Inatsit isumannaannerusoq siunissarlu eqqarsaatigalugu atorneqarsinnaasoq anguniarlugu Ilisimatusarfik taama piumasaqarpoq.

Kisianni inatsisissatut siunnersuut taamatut isikkoqartillugu suliareqqitassanngortinneqarnissaa aalajangiusimagini ilinniartitaanermut Naalakkersuisoq Tommy Marø oqarpoq.

Taamaattorli inatsisip peqqissaarunneqarnissaa siunertaralugu inatsisartut aappaagu upernaakkut ataatsiminnissaanni suliarineqarnissaa kinguartinneqassasoq, Naalakkersuisoqataasut Atassutikkut piumasaraat.

Naalakkersuisut peqqissaarunneqarsimanngitsumik inatsisissamik siunnersuuteqartut Demokraatit aamma oqarput.

Ilinniarfissuup, Ilisimatusarfiup, Isumaginninnermik Siunnersortinngornianut Ilinniarfiup, Tusagassiornermik Ilinniarfiup, kiisalu Inerisaaviup ataatsimuulersinneqarnissaat inatsisissatut siunnersuummi anguniarneqarpoq.