Inatsisissaq Savalimmiunut tunngasoq akerleraat

maajip 19-at 2005 11:20

Savalimmiuni oqartussaaffinnik tigusinissaq pillugu kiisalu kalaallit savalimmiormiullu nunanut allanut politikkeqarnermut tunngatillugu pisinnaatitaanissaannik inatsit Folketingimi ippassaq siullermeerlugu oqaluuserineqarpoq.

Savalimmiut sinnerlugit Folketingimi ilaasortat Høgni Hoydal Republikaanerineersoq aamma Anfinn Kallsberg Folkeflokkenimeersoq inatsisissatut siunnersuutip oqaluuserineqarnerani oqaaseqarput.

Høgni Hoydal Savalimmiuni naalakkersuisunut illuatungiliuttut taperserlugit oqarpoq Savalimmiunut tunngatillugu oqartussaaffinnik tigusinissamik kiisalu kalaallit savalimmiormiullu nunanut allanut tunngasuni politikkikkut pisinnaatitaanissaannik inatsisissatut siunnersuut, Savalimmiormiut nunat tamalaat akornanni pisinnaatitaaffiinut periarfissaanullu atatillugu annertunerusumik iluaqusiinavianngitsoq.

Inatsisissatut siunnersuut Savalimmiuni Lagtingip sap. ak. matuma siuliani akuerisaa Folketingimi akuerineqassaguni Savalimmiut nunanut allanut tunngatillugu periarfissaanik akornusiiginnassasoq Høgni Hoydal isumaqarpoq.

- Taama aqqiiniarneq tunngaviusumik allannguiunnanngilaq, naalagaaffeqatigiinnermilli nutarterinerinnartut issalluni, Høgni Hoydal oqarpoq.

- Savalimmiut Kalaallit Nunaatalu ataatsimoorlutik soqutigisaat eqqarsaatigalugit, isumaqatigeeqqaaratik allanut immikkut isumaqatigiissuteqarsinnaanngillat. Soorlu aalisarnermut tunngatillugu, Kalaallit Savalimmiormiullu immikkut soqutigisaqarput, aalisarnikkut isumaqatigiinniarnerni isumaqatigiinngittoqassappat isumaqatigiinniarnerit danskit nunanut allanut ministereqarfiannit tiguneqassapput, tamannalu pisinnaatitaaffitsinnik killiliinerussaaq, Høgni Hoydal tungavilersorpoq.

Nunarput sinnerlugu Folketingimi ilaasortat Siumumeersup Lars-Emil Johansen-ip Inuit Ataqatigiinneersullu Kuupik Kleistip Høgni Hoydal isumaqatigaat, Lars-Emil Johansen ima tunngavilersorpoq:

-Høgni Hoydal Atlantikup avannaani qinikkat suleqatigiiffiat sinnerlugu oqaaseqarpoq, matumalu siornatigut pingasuulluta, Høgni Hoydal Kuupik Kleist uangalu ministeriuneq Anders Fogh Rasmussen allagaqarluta kajumissaarsimavarput inatsisissatut siunnersuut tunuarteqqullugu, isumaqaratta nunarput Savalimmiut Danmarkilu akunnerminni isumaqatigeeqqaartariaqartut taamaattumik inatsisiliortoqartinnagu.

Lars-Emil johansen oqarpoq. Inatsisip namminersulernissamut akornutaasiinnginnissaa qulakkeerneqaqqaartariaqarsoraa.

Ukiup matuma ingerlanerani naalakkersuisut siulittaasuat Hans Enoksen kajumissaarsimagaluaropaat inatsisissamik tunuartitseqqullugu.

- Kisianni paasivarput Inatsisartunit akuersissutigineqartoq namminersulernissamullu piareersarnermut akornusiinnginnissaa qulakkeerniaqquneqarsimasoq paasivarput.

Savalimmiuni oqartussaaffinnik tigusinissamut kiisalu savalimmiormiut nunanut allanut politikkeqarnermut atatillugu piginnaatitaanissaannik inatsit akuersissutigineqassappat Savalimmiormiut inuiaaasutsikkut ullorsiorneranni juulip 29-iani atuutilersinneqarniarpoq.