Inatsisissaq kinguartinneqassanersoq suli aalajanginngilaat

Aalisarnermut inatsisissap naammassineqarnissaa kinguartinneqassanersoq Inatsisartut suli aalajanginngilaat. Aalisarnermut inatsisissap Inatsisartuni oqaluuserineqarnera kingulleq ippassaq pivoq, Aalisarnermullu Naalakkersuisoq, Finn Karlsen, inatsisartuni partiinit illuatungiliuttunit uppitinniarneqaraluarluni.

Demokraatit, Inuit Ataqatigiit Kattusseqatigiillu Partiiat ataatsimik ikinnerussuteqarlutik uppititseriaraluarnertik iluatsinngilaat.

Aalisarnermut inatsisissaq maannangaaq suli kinguartinneqarsimannginnersoq, Inatsisartut allattoqarfiata pisortaa Nicolaj Sørensen aperigatsigu ima akivoq:

- Aap, ilumoorpoq. Tatiginnikkunnaarnissamik taasititsiniarneq pinngitsoortinniarlugu siunnersuuteqartoqarmat, peqataanik aalajangerneqarpoq oqaluuserisassap tullianut ingerlaqqittoqassasoq, Inatsisartut allattoqarfiata pisortaa Nicolaj Sørensen radioaviisimut oqarpoq, nangillunilu:

- Ataatsimiinnermik aqutsisoq kinguninngua taamaaliorpoq, apeqqutigineqartut tunngavigalugit oqallinnissamut saattoqarmat, inatsisartut allattoqarfianni pisortaq oqarpoq.

Ataatsimiinnermi oqaluuserisassat pillugit ulloqeqqareernerup kingorna ataatsimiittoqalerpat nassuiaateqartoqarumaartoq taassuma aamma oqaatigaa, oqaluuserisassani punktit marluk, tassa punkt 8 aamma 17-i kinguartinneqartussatut aalajangiiffigineqartussaassammata.

Ippassaq ataatsiminnermi pisut tunngavigalugit Inatsisartuni suleriaatsip eqqortumik malinneqarsimanera Nicolaj Sørensenip erseqqissaatigaa.

Nicolaj Sørensenip oqaasii naapertorlugit Aalisarnermut inatsisissaq pillugu ullumi taasititsisoqassagunarpoq.