Nunatsinni oqartussaaffiit amerlanersaat Danmarkip akisussaaffigiunnaarnikuugai, EU-p Ruslandimut pillaatitut iliuuseqarnermini apeqqutaatinngilaa. Tamannali nutaamik inatsisiliornikkut erseqqissarneqassaaq.Assi: Scanpix

Inatsisissaq: Danmark Ruslandimut naalagaaffeqatigiit sinnerlugit pillaatitut iliuuseqarsinnaalissasoq

Inatsisissaq napertorlugu Danmark nunatsinni oqartussaaffigisani atorlugit Ruslandimut Belarusimullu pillaatitut nunatta akuersineratigut iliuuseqarsinnaanissaanngussaaq.

Ruslandip Ukrainemut saassussinera nalagaaffiit akunnerminni inatsisaannik unioqqutitsineruvoq, tamannalu russinut kinguneqartariaqarpoq. Nunat killiit, nunarput ilanngulluni, tamatumunnga isumaqataapput. 

Taamaammat USA, EU nunallu arlallit ilaatigut præsidentip Putinip naalakkersuisuinut, tapersersuisuinut Ruslandimilu inuussutissarsiortut ilaannut pillaatitut iliuuseqarput. 

AAMMA ATUARUK EU-p Ruslandimit uuliamik eqqussuineq ukioq manna naatinnagu inerteqqugilerniaraa

Nunarput EU-p Ruslandimut maajimi killersuineranut aamma ilannguppoq. Nunatsinneersullu ilaatigut Ruslandimik niueqateqaqqusaajunnaarput Ruslandilu nunatsinni niueruteqaqqusaajunnaarluni.

Danmarkilli EU-llu pillaatitut iliuuserisaasa ilaat Danmarkip nunatsinni suli oqartussaaffigisaanut attuumassuteqarput.

Pissutsillu ullumikkutut itsillugit Danmark nunatsinni ilaatigut suli oqartussaaffeqaraluarluni nunarput sinnerlugu pillaatitut iliuuseqariaannaanngilaq. Taamaammat Folketingi inatsisiliortariaqarpoq, taannalu ukiaru oqaluuserisassaavoq.

Pillaatitut iliuutsit nunatta Danmarkillu oqartussaaffiisa killingannik qaangiisut 

Taamaammat danskit inuussutissarsiornermut ministereqarfiata Namminersorlutik Oqartussat Danmarkip nunatsinni oqartussaaffigisani atorlugit Ruslandimut pillaatitut nunatta akuersineratigut iliuuseqarsinnaanissaanut inatsisissatut siunnersuut pillugu oqaaseqaqquaat.

Politikkikkummi oqartussaaffiit nunatta, Savalimmiut Danmarkillu avinnikuugaat, EU-p inatsisaani apeqqutaatinneqanngimmat.

AAMMA ATUARUK Sanktioner mod Rusland kan også gå udover grønlandske virksomheder

Assersuut:

Ruslandilli Ukrainemi qeqertaasaq Krim 2014-imi tiguarsimatsiaraa, nunat EU-mi ilaasortat pappiaqqanik nalilinnik Ruslandimik niueqateqaqqusaajunnaarput. Danmarkip pappiaqqanik nunatsinni niueruteqarneq suli oqartussaaffigaa.

Russilli umiarsuaat nunat EU-mi ilaasortat umiarsualiviinut taleqqusaanngitsut, EU-p inatsisaani allaqqavoq. Nunarpullu umiarsuarnik suminngaanneersuugaluartunilluunniit nammineq talissinnaatitsivoq.

Inatsisitigut tukattoqarpoq. Taamaammat Ruslandimut niuernikkut pillaatitut iliuuseqareeraluarluni nunarput umiarsuarnik suminngaanneersuugaluartunilluunniit nammineq talissinnaatitsiinnarsinnaanissaanik qulakkeerisussamik nutaamik inatsisiliornissaq pisariaqartoq, Danmark isumaqarpoq.

- Taamaammat pillaatitut iliuuseqarnermut peqqussutit Kalaallit Nunaannut nunami tassani pissutsinut nunallu taassuma oqartussaaffiinut naleqqussarlugit aamma atuunnissaannik inatsisiliortoqarnissaa aalajangersarneqartariaqartoq, inatsisissatut siunnersuummi allaqqavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl