Inatsisinik unioqqutitsineq peqqissanngitsoq Naalakkersuisut neriorsuutigaat
- Aningaasaqarnermut Akileraartarnermullu ataatsimiititaliamut qinnuteqaatit taamaattut inatsisitigut unioqqutitsinerupput, Namminersorlutillu Oqatussanut pakatsinartut tatiginninnermillu atornerluinertut taaneqarsinnaasut aamma pakatsinarpoq tamanna politikerinit atorfilinnillu suliassatut tiguneqarnissaanik qisuariartoqarsimannginnera, Aningaasaqarnermut Akileraartarnermullu ataatsimiititaliaq allappoq.
Aningaasanik tapiiffigineqarnissamik qinnuteqaat siulleq pivoq siorna februaarip sisamaanni, taamani Naalakkersuisuusunit qinnutigineqarluni. Taama qinnuteqarnerup nalaani Inatsisartunut qinersinissaq, marsip aqqaneq aappaannin pisussaq tamanut nalunaarutigineqareerpoq, taamaalillunilu Naalakkersuisut suliassaralui qaffasissumik atorfilinnit aqunneqalereersimallutik.
Peqqussutini allassimavoq, qinersisoqarnissaanik sulineq aallartereersimappat imaluunniit pilersaarutigineqalereersimappat, tamanna politikkikkut atuutsinneqarsinnaanngitsoq.
- Peqqussummi taama allassimasoqarnera eqqarsaatigiinnarluguluunniit tamanna Naalakkersuisut allattoqarfiinit ilisimaneqartussaagaluarpoq, tamannalu ilisimaneqanngippat siunnersuutigineqarsimalluni tamassuma aaqqinneqarnissaa siunertaralugu pikkorissartitsisoqartariaqaraluartoq.
Aningaasaliissutissatut immikkut qinnutigineqartut akuersissummik tunineqarsinnaapput aatsaat tamanna siumoortumik ilisimaneqanngippat. Kommunimulli qinersinissaq siumut ilisimaneqareermat tamanna siumoortumik ilisimanngisatut isikkulerlugu aningaasaliiffigineqarsinnaanngilaq, tassami tamanna aningaasanut inatsimmi 2012-moortumut ilanngunneqareersimammat.
Inatsisartunut siorna qinersereernerup kingorna Naalakkersuisunngortut siulimissut aamma iliuuseqarput, tassami taakku qinnutigaat partiit kommuinimut qineqqusaarnissaannut aningaasaliisoqarnissaa. Tamannalu aamma tujorminartutut Aningaasaqarnermut Akileraartarnermullu ataatsimiititaliamit isigineqarpoq.
Inatsisartuni qinersereernerup kingorna partiit nutaat amerlanerussuteqarnertik tunngavilersuutigalugu, aningaasanik qinnuteqartoqarpoq, taamaaliornermikkut aningaasanut inatsimmut nutaassamut sunniuteqarsinnaanertik aamma toqqammavilersuutigalugu. Tamannali Aningaasaqarnermut Akileraartarnermullu ataatsimiititaliamit itigartitsissutigineqarpoq oqarlutik politikkikkut suliaqarnermut sanilliullugu inatsisit malillugit nunap aqunneqarnissaa pingaartinnerusariaqarmat.
Aningaasanik qinnuteqartarnermi inatsisit atuutsinneqartut malinneqartarnissaannik ataatsimiititaliaq Naalakkersuisunut qinnuteqarpoq. Tamanna pillugu Aningaasaqarnermut Nunamullu Namminermut naalakkersuisoq, Vittus Qujaukitsoq neriorsuivoq, taama iliortarneq qimanneqarumaartoq.