Inatsisinik atuutitsinermut immikkut siunnersortip atorfini maanaannaq qimakkaa

Immikkut siunnersortitut maanna tunuartup sakkortuumik nakuusersimanini pissutigalugu nunatta eqqartuussiviani 2010-mi pinerluuteqarsimasunut inissiisarfimmiittussanngortinneqarluni pineqaatissinneqarsimanera tamatumalu kingunerisaanik politiini suliunnaartariaqarsimanera pillugu KNR-ip naalakkersuisoqarfimmut saaffiginnereerneratigut tamanna pivoq.

- Mala Høy Kúkomut Naalakkersuisunulluunniit tamarmiusunut akornutaanissara kissaatiginngilara.

KNR-ip Pinngortitamut, Avatangiisinut Inatsisinillu Atuutsitsinermut Naalakkersuisoq apersorumallugu saaffiginnissuteqarnerata kingorna Gerth Platou Jacobsen KNR-imut taama allagaqarpoq.

Immikkut siunnersortitut atorfinitsinneqaqqammersoq nassuiaavoq "KNR-imi radioaviisip saaffiginnissuteqareerneratigut naalakkersuisorlu Mala Høy Kúkolu paaseqatigiissutigisaminnik atorfimminit tunuarluni". Gerth Platou Jacobsen 2009-mi pisut marluk tunngavigalugit sakkortuumik nakuusersimasutut unnerluutigineqarluni pineqaatissinneqarpoq. Gerth Platou Jacobsen piffissami tassani Aasiaat Politiivini stationslederiuvoq, nakuusernerillu marluusut aappaat politiit biilianni pisimalluni.

Nunatta Eqqartuussiviani aalajangiiffisassanngortinneqarpoq stationslederilu ulluni 40-ni pinerluuteqarsimasunut inissiisarfimmiittussanngortinneqarluni, taamaalillunilu politiitut aamma sulisinnaajunnaarluni.

Mala Høy Kúkomut immikkut siunnersortitut maanna tunuartup, Gerth Platou Jacobsenip, erseqqissarpaa Aasianni nakuusersimasutut pineqaatissinneqarnerminit ukiut arlallit maanna qaangiutereersut, taamaattumillu inatsisinik atuutsitsinermut tunngatillugu Naalakkersuisunut siunnersortaanissaminut tamanna akornutissaanngitsutut nammineq nalilersimallugu.

Politikerip Atassummeersup atorfeqarfigisaa Radioaviisip ippassarli oqaaseqartinniaraluarpaa iluatsinnaguli.