Inatsisinik atortitsinermut pisortap inuusunnerpaasimanera ilumuunngilaq
Andreas Salmony Namminersorlutik Oqartussani inatsisilerinermi pisortatut 32-nik ukioqarluni atorfinitsinneqarpoq.
Eqqartuussissuserisup Niels Hansen Dammip misissuinerata nassuiaataani qupperneq aqqaneq-aappaanni taama allassimavoq, issuaaneq aallartippoq:
- Atorfinitsinneqarnermut isumaqatigiissummi takuneqarsinnaavoq Andreas Salmony atorfininnermi nalaani 32-nik ukioqarsimasoq. Andreas Salmony taamaasilluni, uanga ilisimasakka naapertorlugit, Namminersornerullutik Namminersorlutillu Oqartussat oqaluttuarisaaneranni, inatsisinik atortitsinermut pisortani inuusunnersaavoq. Ataani atsiortoq isumaqarpoq, inuup taama inuusutsigisup taamatullu taama misilittagakitsigisup inatsisinik atortitsinermut pisortaaneq atorsaatigisimassagaa(...)
Issuaaneq naavoq.
Paasissutissalli eqqartuussissuserisup qulakkeeqqaarsimanngikkai maanna paasinarsivoq. Namminersornerullutimmi Oqartussat Søren Volder inatsisinik atortitsinermut pisortatut 2008-mi atorfinitsimmassuk 30-nik taamanikkut ukioqarpoq.
Paasissutissat taakku Sermitsiaq.AG-p allaaserai, Palle Christiansenillu oqaatigaa paasissutissat taakku minutsit tallimaanngitsulluunniit atorlugit aaneqarsinnaasut.
Palle Christiansen, Inatsisartut suleriaasianni paragraf 37 naapertorlugu Naalakkersuisunut taamaammat ima apeqquteqaateqarpoq:
- Eqqartuussissuserisoq akisussaassusilik taama annertutigisumik kinguneqartussamik misissuisup - inuusunnerminik misilittagakinnerminillu utoqqatsissuteqarsinnaanngitsup - nassuiaammini inuttut isummani ilanngussimammagit eqqumiigaara, paasiniaqqaallannguarnagu ilumut ilumoornersoq. Nalunagu Namminersorlutik Oqartussani pissutsinut ilisimasakissutsi saqqummeriaannaasoq. Naalakkersuisut tassunga qanoq oqaasissaqarpat? Palle Christiansenip Naalakkersuisunut apeqqutigaa.
