Inatsisinik atortitsineq Sara Olsvig-ip siullertut suliaqarfiginiarpaa

Qaammatit arfineq pingasut matuma siorna Sara Olsvig politikkerinngorniarluni aalajangerpoq. Inuit Ataqatigiit kaammattuinerisigut tamanna pivoq. Maanna tassa Christiansborgimi qinikkatut suliartulerpoq Folketingillu oktobarip sisamaani ammarnissaanut piareersariartulerluni.

Pikkorippoq aammalu kalaallisut qallunaatullu assigiimmik oqallorilluni. Qinersisartut ilaat taama tunngavilersuipput qinersinngilaattaa KNRip inuit qanoq isummersornerat ippassigami tipisiormagu. Tassani naapinneqartut ilagaat Sara Olsvigimik qinersiniartut ilaat. Maanna paasinarsivoq kisimi tassannga taasisimanngitsoq tassami Sara Olsvig Inuit Ataqatigiinni qinigaanerpaammat ukiunilu sisamani tulliuttuni Folketingimi ilaasortaasussanngorluni.

- Politikkikkut suliassama siulliit ilagissagunavippaat inatsisinik atortitsinermut tunngasoq, Sara Olsvig KNR.gl-mut oqarpoq.

- Pinerluuteqartoqarsimatillugu suliap piffissarujussuaq suliariniarneqartarnera aammalu kommunefogedit atugaat ajorluinnarput. Taamaammat suliani siulliit ilaattut suliarissavara inatsisinik atortitsinerup misissornissaa. Kisianni tassani pilertortumik tigusiniarnissaq pineqanngilaq.

- Suliassaqarfik taanna oqimaattorujussuuvoq pitsanngorsarneqarnissaminillu pisariaqartitsilluinnarluni, Sara Olsvig oqarpoq.

Politikkeri taanna 32-nik ukiulik politikkimut attuumassutilinnik suliaqalerpoq 2007-mi Atlantikup Avannaani suleqatigiinni DNAG-mut naalisarneqartartuni sulilerami. Antropologitut naammasserlaatut 2009 aallartilaartoq nunatsinnut angerlarami taamanikkut Namminersorneq pillugu allattoqarfiusumi atorfinippoq. Namminersorneq atulermat tamatuma kingorna Inuit issittormiut siunnersuisoqarfianni ICC-mi atorfinippoq.

- ICC-mi sulineq politikkertalerujussuuvoq. Aamma ukiuni kingullerni ussernartorsiorfigisarsimavara politikkimut akuulernissara. Isumaqarpunga pissanganartorujussuussoq isummersinnaassuseq ilisimasaqassuserlu atorlugit ineriartornermut sunniuteqarsinnaaneq, Sara Olsvig nunatsinnut uternermi kingorna ukiut marluk siulliit politikkikkut sorlaqarfissaminik ujarleqqaarsimasoq oqarpoq.

- Taava ukiormanna februaarimi IA-kkunnit attavigineqarpunga aammalu ingerlaannapajaaq akuersivunga IA sinnerlugu qineqqusaarniarlunga, Sara Olsvig oqarpoq.

Maanna Københavnimut nuukkallalerpoq aalajangersimavorlu Christiansborgimi sulineq tamakkiisumik ingerlanniarlugu.

- Suliffinnut atatillugu ICC-mi ataasiakkaanik naammassisasaqarpunga. Maannali tassa Christiansborgimi suleqatissannik isumaqatigiissusioriartussaanga. Taaseqatigiittarnissamut isumaqatigiissusiortoqartussaassaq taanna aqqutigalugu ataatsimiititaliani peqataasoqarsinnaaniassammat aamma soqutigilluinnarpara Savalimmiormiunik suleqateqarnitta ingerlaannarnissaa, Sara Olsvig meeraanermini inuusuttuaraanerminilu Aasianni Sisimiunilu najugaqarsimasoq oqarpoq.

Angajoqqaarai ilinniartitsisoq Lars Olsvig inuusunermi nalaani aamma arsaannermi nunanut allanut unammisartuniissimasoq. Anaanagaa Anne Mette Olsvig qallunaanit kingoqqisoq taannalu Qasigiannguani nunaqarfimmi uumassusilimmi suliami akisussaavoq. Taakku ullumikkut Lars Olsvigip inunngorfiani Qasigiannguani najugaqarput.