Eqqunngitsoq tunngavigalugu soraarsitsisimanermut atatillugu, Nunatta eqqartuussiviani taassumalu kingorna Østre landsret-imi eqqartuussinermi taarsiisoqarnissaanut aalajangikkat, Naamminersornerullutik oqartussat naammassiniarsimanngilai.
Namminersornerullutik oqartussat, inatsisiliortuullutik IMAK-imut ilaasortamut, namminersornerullutik oqartussani allaffimmi pisortaasimasumut, soraarsitaasimasumulli, 1 million koruunit sinnilaarlugit akiligassatik suli akilersimanngilaat, tamannalu IMAK-ip tupigusuutigaa, siulittaasorlu Sivso Dorph ima oqarpoq:
- Namminersornerullutik oqartussat naalakkersuisuupput inatsisiliornermillu ingerlaqartuullutik, taamaattumik tupinnarpoq eqqartuussiviit aalajangigaat namminersornerullutik oqartussat naammassiniarsimanngimmassuk, Namminersornerullutimmi oqartussat inatsisiliortuupput, eqqartuussiviillu aalajangigaat naammassisariaqarpaat, Sivso Dorhp, IMAK-imi siulittaasoq oqarpoq nangillunilu: - Ernianut tunngassuteqartut Namminersornerullutik oqartussat naammasserusussimannginnamikku, maannakkut suliaq nunatta eqqartuussivianut ingerlateqqittariaqalerparput. Pisoq kipiluttunarpoq, isumaqarpungalu eqqartuussivimmi aalajangikkat namminersornerullutik oqartussat malittariaqaraluaraat.
Taama oqarpoq, IMAK-imi siulittaasoq Sivso Dorph. IMAK-ip eqqartuussinermik ingerlatsisimaneranut aningaasartuutaasimasut 185.000 koruunit namminersornerullutik oqartussat akilereersimagaat.
Namminersornerullutik oqartussani atorfinitsitsisarnermut pisortaqarfimmeersut attaviginiaraluaratsigit iluatsinngitsoorparput.