Inatsisilerituut: Puisip amiinik tunisassiat EU-mut eqquteqqusaapput

EU-mi nunat GATT-mik taallugu niuernermi isumaqatigiissusiaminnik unioqqutitsissapput, puisip amiinik tunisassianik eqqussinngilluinnarnissaq niueqateqannginnissarlu eqqutissagunikku, taama naliliipput EU-p nammineq inatsisiliornermut siunnersortai.

EU-mi niueqatigiinnermut tunngatillugu aalajangiisartut inatsisilerituunit siunnersoqqusimapput, maannalu siunnersortit nalunaarusiaasa takutippaat puisip amiinik eqqusseqqusiunnaartoqassappat, tamanna EU-p inatsisiliareriigaanik unioqqutitsinerussasoq.

Naggueqatigut sinnerlugit Inuit Tapiriit Kanatamip præsidentia Mary Simon tusagaq nuannaarutigalugu radioavisimut oqaatigaa.

- Inatsisiliornermi siunnersortit naliliinerat assut nuannaraarput, erseqqeqaaq paatsuugassaananilu. Naggueqatigiit inuit EU-mut ataqqinnittuupput taamaammallu aamma Europami nunani eqqisseqatigiinnissamik suleqatiginnikkumasumillu pissuseqalerniarneq ataqqivarput. Aamma tatigaarput EU Europamilu innuttaasut EU-p nammineq inatsisiliaanik, nunarsuarmi inatsisaasunik niuernermilu isumaqatigiissutinik malinnissasut, Mary Simon oqarpoq.

ICC Canadami præsidentiusoq Duane Smidt EU-mit tusagaq pillugu naammagisimaarinnippoq, oqarluni inatsisilerituut naliligaannik EU-p inerteqquteqalerniarneranut akerliliisumik - pingaaruteqartumik erseqqilluinnartumillu - Canadami oqartussat sakkussaqalersut.

- Puisip amiinik tunisassianik niueqatigiinneq nunarsuarmi inerteqqutaanngilaq, taamaammat Canadami oqartussat kaammattussavakka EU nunallu ilaasortai, nunat tamat niueqatigiinneq pillugu inatsisiliaannik ataqqinneqqussagaat, Duane Smidt erseqqissaavoq. Taamalu tusagassiisuuvoq Marianne Stenbæk, Montreal Canadami ilanngutassiortorput.