Inatsisilerituut angerlararput

Taama inatsisilerituut aallararnerannut ilaatigut tunngavigineqarpoq akissarsialuppallaarneq, suliffimmilu pissutsit, taama oqarpoq Inatsisilerituut peqatigiiffianni DJØF-imi siulittaasoq Louise Amker.

- Namminersornerullutik Oqartussat allaffianni massakkorpiaq inatsisilerituunik amigaateqaqaagut, aammattaaq ilinniagartuunik amigaateqaqaluta, taama oqarpoq Inatsisilerituut peqatigiiffiata siulittaasua Louise Amker.

Taanna erseqqissaavoq sulinerminni inatsisilerituunik amigaateqarneq pissutigalugu tamaviaaqalutik ulluinnarni sulillutik, taassuma neriuutiginerarpaa piaarnerpaamik inatsisilerituunik ilinniagartuunillu atorfinittoqarumaarnissaa.

Louise Amker aperaarput sooq inatsisilerituut Kalaallit Nunaanukarumasannginnersut.

- Uanga nammineerlunga isummissaguma isumaqarpunga akissarsiakinneq pissutaanerusoq, oqarsinnaavungalu peqatigiiffitta DJØF-ip maanna sulissutigimmagu akissarsiagut pillugit Namminersornerullutik Oqartussanut isumaqatiginninnerit neriuutigaarpullu iluamik angusaqartoqarumaartoq, oqarpoq.

Taassuma aamma oqaatigaa suliffimmi pissutsit pissutaallutik inatsisilerituut taamaatittartut.

- inatsisilerituut arpasukaartuarlutik maani sulipput saagit suliassat suliaraat aammalu politikkikkut suliassat suliaralugit soorlu inatsisartuniit inatsisiliaat suliaralugit. Isumaqarpungalu ukiaru suli ulapinnerulissasut, Louise Amker oqarpoq.

Taanna isumaqarnerarportaaq Namminersornerullutik Oqartussat inatsisilerituutut suliffigissallugu nuannersuugaluartoq tassamigooq Danmarkimi inatsisilerituutut suliassanut sanilliullugu assigineqanngimmat.

Taannattaaq isumaqarpoq ajornartorsiutip tamatuma qaangernissaanut ilaasortaminnik ilinniartitseqqiineq periarfissaasinnaasoq, isumaqarnerarportaaq inatsisilerituunik inuttassarsiornermi inigissaartitsinissaq pingaaruteqartoq.