Inatsisilerituunngorniarneq nutaaq soqutigineqarluartoq

Ilisimatusarfimmi inatsisilerituunngorniarluni ilinniagaq nutaaq soqutigineqartupilussuuvoq. Inissat 20 tamarmik inuttassarsisut, arlallillu utaqisuuniittut, rektori Gitte Adler Reimer, iluarisimaaqisoq, oqarpoq.

- Nuannerluinnaqqissaarpoq taama inatsisilerituunngorniarluni ilinniarfik nutaaq septembarimi aallartittussaq taama soqutigineqartigimmat, Gitte Adler Reimer taama oqarpoq.
 
Inatsisilerituunngorniarluni ilinniakkamut, 20-inut inissaqartumut, 70-it qinnuteqarsimapput, taamaammallu Ilisimatusarfik utaqqisunut allattuiffiliorsimavoq.
 
- Ilinniagaq taanna inuiaqatigiinni amigaatigineqarsimasoq tassuunatigut takutippaa. Tassa inatsisilerituutut bachelorinngorniarsinnaaneq, kisianni naliginnaasartupilussuuvoq ilinniakkat nutaat takkukkaangata qujanartumik soqutigineqarluartartut, taanna oqarpoq.

AAMMA ATUARUK Piumasaqaatit qaffasissuutinnerisigut ilinniarnerup qaffasissuunissaa qulakkeerniarneqartoq

Qinnuteqartut amerlanerat pitsaasuuvoq, ilinniagarli nutaajummat soqutigineqarluarnera tupaallaatissaanngitsoq, Ilisimatusarfiup rektoria oqarpoq.
 
Ilinniarnersuungorniarfinnit allagartallit qinnuteqarsinnaasimapput, aammali inuiaqatigiinni inatsisilerinermik misilittagallit qinnuteqarsinaallutik.
 
Ilinniartoqatigiit ingerlalluarsinnaaqqullugit, GU-meersunik sulinermillu misilittagalinnik qinnuteqartoqassasoq, Iliniakkamik inerisaasut ukioq manna siusinnerusukkut neriussimapput.
Tamannalumi iluatsittoq, Gitte Adler Reimer oqarpoq.

AAMMA ATUARUK Oqaatsit inatsisilerinermi atorneqartartut kalaallisut taaguuteqanngitsut

- Qinnuteqartut ilinniarnertuunngorniarfimmiinnaanngitsoq qinnuteqartuusimapput, tassami ilinniagaqareersut pikkorissaqqinnissaminnut, ilinniaqqinnissaminnut periarfissaq atorlugu arlallit soqutiginnillutik qinnuteqarsimapput, Ilisimatusarfimmi rektori, Gitte Adler Reimer, taama oqarpoq.
 
Ilisimatusarfimmi septembarimi 205-it aallartittussatut maannamut nalunaarsugaapput. augutsilli 31-iata tungaanut qinnuterqarnissaq periarfissaavoq.

AAMMA ATUARUK Inatsisilerinermik ilinniarfik nunatsinnut iluaqutaassasoq

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl