Inatsisilerituunit attuumassuteqanngitsunik misissuivigineqalerpoq

Misissuisussatut Hans Enoksenip toqqarpaa professor Ole Spiermann. Augusta Salling aperaarput Atassutip tamanna qanoq isumaqarfigineraa:

- Siumuminngaanniit Atassut ippassaq unnukkut saaffigineqarpoq oqaloqatigiumaneqarluni, tassanilu sivisungaatsiartumik ataatsimeeqatiginnermi una anguneqarpoq: Naalakkersuisut arlaannaanngulluunniit attaveqanngitsumik misissuinissamik aallartitsissatut, taannalu pillugu inatsisartut immikkut ittumik oqaluuserinninnissaat pisariaaruppoq, Augusta Salling nassuiaavoq.

Hans Enoksen inatsisartut oqaluttarfiatigut kukkunersiuinermut ataatsimiititaliaq suleqatigineqassasoq pillugu aamma neriorsuuteqarmat qujanarnerarpaa.

- Suliap arlaatigut ippinnartoqarnissaa ernumassutigisariaqanngilaq, oqarpoq.

Inuit Ataqatigiit sinnerlugit inatsisartut landskarsip naatsorsuutaasa kukkunersiorneqartarnerannut ataatsimiititaliami ilaasortaa Olga Poulsen Berthelsen isumaqarpoq, naalakkersuisut imminnut misissortussanngornerat uggornartoq.

- IA-mi misigivugut suliap aallaqqaammut inatsisartut siulittaasoqarfianit itigartitsissutigineqarnera uggornartoq, oqarpoq.

Aamma naalakkersuisut imminnut misissortussanngornerat ippigaat.

- Inatsisartut suliassaq aallartitaat naalakkersuisut imaaliallaannaq tigummassuk pissusissamisuunngilaq. Naalakkersuisut pissaanermik tigusipput, Olga Poulsen Berthelsen nangippoq.

IA-li iliuuseqaqqinngikkallarniarpoq.

- Naalakkersuisut siulittaasuata oqaatigaa sumilluunniit isertortoqassanngitsoq. Neriuppugut kukkunersiuinermut ataatsimiititaliaq suleqatigineqassasoq. Ataatsimiititaliami malinnaaffigissavarput, isumaqarpunga pisussaaffigigipput.

Inuit Ataqatigiit kukkunersiuinermut ataatsimiititaliami ilaasortaat Olga Poulsen Berthelsen taama oqarpoq.

Naalakkersuisut Siulittaasuata Naalakkersuisoqarfianit ualilluinnartoq nalunaarutigineqarpoq, professor Ole Spiermannip misissuinera ukiup naannginnerani naammassineqarumaartoq. Naalakkersuisut siulittaasuat aamma inatsisartut oqaluttarfiannit oqaatigaa, misissuineq naalakkersuisoqatigiinermut kinguneqarsinnaasumik imaqassappat soorunami kinguneqartitsisoqarumaartoq.