Inatsisilerituunik misissuisitsinissaq qatangiinnartinneqartoq
Misissuisitsisoqarnissaa, IA-p tallimanngormat siunnersuutigigaluarpaa, taamaalilluni akisussaaffimmik inissiisoqarniassammat. Tamannali Demokraatit naalakkersuisunut ilaasortamik Tommy Marømik tunuartitserusungaaramik qatangiinnartippaat, Inuit Ataqatigiit siulittaasuat Kuupik Kleist taama isumaqarpoq.
- Ajuusaarnaraluartumik tassa ullumikkut naluarput suliaq ingerlateqqinneqarsinnaanersoq. Tallimanngormat tamatuma oqaluuserineqarnerata nalaani pisut eqqarsaatigalugit aalajangiunneqarallarpoq, Landskarsip naatsorsuutai akuerineqassasut. Taavalu KIIIN-imi ingerlatsinermik misissuisimanermut atatillugu inatsisilerituunik misissuisitsinissamik siunnersuuterput taasissutigineqarmat Inatsisartuni amerlanerussuteqanngitsooratta, Kuupik Kleist oqarpoq, nangillunilu:
- Demokraatit naalakkersuisunut ilaasortamik uppititsinissamik siunnersuutaat aamma naalakkersuisunut ilaasortamik inatsisilerituunik misissuisitsinissamik siunnersuuterput tallimanngormat ajutoortinneqaramik. Naatsumik oqaatigalugu oqaatigineqarsinnaavoq, Demokraatit taamaalillutik siunertarinngikkaluarlugu naalakkersuisunik annaassisutut oqaatigineqarsinnaapput, Kuupik Kleist oqarpoq.
Naalakkersuisunut ilaasortamik Tommy Marømik tatiginninnginnermik taasisitsineq amerlanerussuteqartut qatangiinnartippaat, taava suliassaq tassunga tunngasoq tamaanga killeqarpa?
- Apeqqutaavoq periarfissaqassanersoq kukkunersiuinermut ataatsimiititaliaq aqqutigalugu imaluunniit allatut suliaq taanna malersorneqaqqissanersoq imaluunniit malersueqqinnissaq periarfissaqassanersoq. Tamanna ulluni makkunani misissorparput, takussavarpullu qanoq inerneqarumaarnersoq. Kisianni ingerlariaqqinnissamut qanoq periarfissaqarnersoq ullumikkut oqaatigisinnaanngilarput, Kuupik Kleist naggasiivoq.
