Inatsiseqarnermut tunngasut Aleqap immikkut samminiarai
Suliassaqarfik pineqartoq Folketingimut maanna ilaasortap ilisimasaqarfigilluarpaa, piffissamimi 2005-imit 2007-imut, taamani naalakkersuisut siulittaasorisaata Hans Enoksenip siulersugaanik Naalakkersuisuusuni ilaqutariinnermut inatsisinillu atortitsinermut naalakkersuisuuvoq.
Aleqa Hammond naapertorlugu Nunatsinni innuttaasut ilarpassui inatsisitigut isumannaatsumik inissisimanngillat, tamannalu Danmarkip akisussaaffigigaa, Sermitsiami ullumi saqqummersumi allaaserisami erseqqissaavoq.
- Kalaallit Nunaanni nunaqarfiit illoqarfiillu qanoq inissisimanersut nunat assigiinngitsut akornanni paasineqarpat Danmark assuaritivissussaaq, Aleqa Hammond aviisimut taama oqarpoq.
Pingaartumillu kommunefogedinik amigaateqarneq Aleqa Hammondip isumakulunnartoqartippaa.
Marlunngorpat - Folketingip ammarnera nalerorlugu - Folketingimut ilaasortap Siumumeersup danskit inatsisinik atortitsinermut ministeriat Søren Pind aamma politimesteri Bjørn Tegner Bay politiinut tunngasunik isumaqatigiissuteqarnermut tunngasunik ataatsimeeqatigissavai.