Inatsiseqarnermut pisortap soraarsitaanera AG-p qulaajaaffigaa

Aviisip AG-p Aleqa Hammondip siunnersortiminik Julie Rademacherimik atorfinitsitsinera pillugu allagaatinik takunnissinnaatitaanermik kissaateqarnera pissutigerpiarlugu, Namminersorlutik oqartussani inatsiseqarnermut pisortaq Andreas Salmony juunimi ingerlaannartumik soraarsinneqarpoq. AG-mi ullumi saqqummersumi tamanna allaaserineqarpoq.
Allattoq Karsten Sommer, Simon Uldum
juulip 24-at 2013 06:16

Atorfilittap ataqqisaasup soraarsitaariasaarneranut suna pissutaanersoq nalorninartoqartinneqarsimavoq.

Tusarfiilli aterminnik taaseqqusinngitsut pingasut imminnut attuumassuteqaratik aviisimut oqaluttuaraat, AG-p allagaatinik takunnissinnaatitaanermik kissaateqarnerata ullunik qulinik piffissaliussap iluani akissuteqarfiginissaanik kissaateqarnera pissutigalugu, juunip qaammataani ullaakkut pigisai katersoqquneqarput tamatumalu kingorna atorfimminit soraarsinneqarluni.

Aviisi naapertorlugu taamani naalakkersuisoqarfimmi pisortaagallartup Søren Stach Nielsenip allagaatinik takunnissinnaatitaanermik piumasaqarneq sivitsorsarsimavaa - Julie Rademacherip Aleqa Hammondip siunnersortaatut atorfinitsinneqarneranut naammassiniagassat piffissami tassani suli iluarsineqarsimanngimmata.

Inatsiseqarnermut pisortaq, AG-p paasissutissanik pissarsiai malillugit, allagaatinik takunnissinnaatitaanermik piumasaqarneq piffissaliussaqeqqorlugu akissuteqarfiginiarlugu suliffeqarfiup iluani nalunaarutinik arlalinnik allagaqarsimavoq, qisuariarfigineqanngitsunilli.

Inatsiseqarnermut pisortap soraarsitaareernerata kingorna ullualuit qaangiunnerini, allagaatinik takunnissinnaatitaanermik piumasaqarneq Naalakkersuisoqarfimmit aatsaat tunniunneqarpoq, tamatumanilu Namminersorlutik Oqartussat Rademacherillu suliffeqarfiata Pilup akornanni isumaqatigiissummik pisortatigoortumik, AG-mut nassiunneqarnera ullormik ataatsimik sioqqullugu atsiorneqarsimasumik, imaqalersimavoq.

Aviisip suliap ingerlanneqarsimanera Aleqa Hammondimit, Julie Rademackerimit susassaqartunillu pisortatigoortunit allanit uppernarsartissinnaasimanngilaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk