Inatsiseqarnermut ministerit Ilulissani katersuutilerput
Syriamut sorsoqataajartortartut qanoq suliniuteqarfigineqassanersut katersuunnermi ilaatigut oqallisigineqassasoq, inatsiseqarnermut ministeeriaqarfik tusagassiuutinut nalunaaruteqarluni ilisimatitsivoq.
- Ikinnerpaamik 115-it Danmarkimit Syrialiarlutik imaluunniit Irakiliarlutik sorsunnermut illernartumik taaneqartumut sorsoqataajartorsimapput. Tamanna ernumaammernartuuvoq, ingammik sorsoqataasimasut ingasattajaartunngorsimallutik Danmarkimut uteraangamik isumannaallisaanermut aarlerinartorsiortitsisarmata, inatsiseqarnermut ministeri Søren Pind oqarpoq.
Taamaattumik taassuma nunani avannarlerni inatsiseqarnermut ministerit misilittakkanik avitseqatiginissaat neriulluarfigaa.
Pinngortitamut, Avatangiisinut Inatsiseqarnermullu naalakkersuisoq Mala Høy Kúko Nunani Avannarlerni inatsiseqarnermut ministerit ataatsimiinneranni Nunarput sinnerlugu ataatsimeeqataassaaq.