Inatsiseqarnermut ministeri Nick Hækkerup coronamik tunillatsissimasoq

Inatsiseqarnermut ministeri, Nick Hækkerup (S) coronamik tunillatsissimalluni, Facebookikkut allappoq.

Taassuma quersorneq kissarneqarnerlu ersiutigalugit ajoranili allappaa.

- Coronamik tunillatsissimanera suleqaterpassuarnut maanna angerlarsimaffimminnit sulisunut sunniuteqarpoq, tamanna soorunami aamma uannut ilaquttannullu ilungersunarnerulersitsilaarpoq, pisorli tamanna danskit allat amerlasuut aamma nalaappaat.

- Quersorneq kissarneqarnerlu ersiutigaakka, taamaakkaluartorli ajunngilanga. Qanillisimasakka soorunami nalunaarfigineqassapput, taamaalilluta tunillaassuuffiusinnaasut erngertumik unitsissinnaassallutigit. Imminut – minnerunngitsumillu immissinnut paaralusi, inatsiseqarnermut ministeri allappoq.

Nick Hækkerup coronamik ersiuteqarnini pissutigalugu angerlarsimagallassalluni coronamullu misissortissalluni ataasinngornermi allappaa.

Inatsiseqarnermut ministeri folketingimi ilaasortanit qassiiusunit coronamik tunillatsissimasutut paasineqarsimasuni kingulliugallarpoq.

AAMMA ATUARUK Folketingi coronavirusimik tunillatsittoqareersorlu matusoq

Socialdemokraatit eqqartuussiveqarnermut tunngasunut oqaaseqartartut, Jeppe Bruus coronavirusimik tunillatsissimasutut paasineqarnikuuvoq. Aamma De Konservativit siulittaasuat, Søren Pape Poulsen.

Ventrep illersornissamut tunngasunut oqaaseqartartua, Lars Christian Lilleholt aamma tunillatsissimavoq. Taassuma nammineq oqarneratut ”napparsimalaalersimavoq”, nakorsaammillu Remdesivirimik nakorsaateqarluni.

Ministerit qassiusut tunillatsissimasumut qanillisimanertik pissutigalugu coronamik misissortinnerminnik akissutersinissartik aamma utaqqivaat.

Christiansborgimi coronavirusimik tunillaassuuttoqalernera pissutigalugu Folketingimi siulittaasoqatigiit ataatsimiipput pissutsillu oqallisigalugit.

Matumanilu ataatsimiinnermi tusarnaartunut atatillugu nutaanik killilersuisoqalernissaa aalajangerneqarpoq. Inatsisinilli suliaqarneq coronamik tunillaassuuttoqaraluartoq ingerlatinnarneqassaq.

Bjørn Brandenborg Socialdemokraatineersoq folketingimi ilaasortanit siulliulluni tunillatsissippoq. Taassuma tamanna oktobarip ulluisa aappaanni nalunaarutigaa.

/ritzau/