Inatsisartut upernaakkut ataatsimmiinnissaata aallartinnissaanut ulloq aalajangerneqarpoq
![](/sites/default/files/styles/image_934x467/public/article_images/inatsisartut_3.jpg?itok=uc8_ncw1)
Inatsisartunullu ilaasortat ataatsimiigiarnissamut piffissaliussat nutaat sungiunniartussaassavaat.
Ataatsimiinnerit nalunaaqutaq ataatsimut naliginnaasumik aallartinneqartaraluarput, upernaakkulli ataatsimiinnerit nalunaaqutaq qulinut aallartinneqartalissapput, nalunaaqutarlu marluk tungaanut ataatsimiittassallutik.
Sapaatit akunnerata ingerlanerani ataatsimiinnerit aamma amerlanerulissapput.
Inatsisartut ataatsimiinneranni ataasinngornerit tallimanngornerillu naliginnaasumik ataatsimiiffiuneq ajoraluarput. Upernaakkulli ataatsimiinnerni ullut taakku aamma ataatsimiiffiussapput.
Inatsisartunulli ilaasortat aamma ullut ilaanni ataatsimiinnavianngillat. Arctic Circle Forumip maajip 17-ianit maajip 19-iata tungaanut ataatsimeersuartitsinerani, ullunilu ullorsiorfinni apriilip 22-iani, maajip tallimaani maajillu 16-iani Inatsisartuni ataatsimiittoqassanngilaq.
Naalakkersuisut pingasunngornerni suli apeqqarissaarfigineqartassapput, nalunaaqutarli qulinut aallartittartussanngorlutik. Apriilip 13-iani siullermik apeqqarissaaartoqassaaq.
Inatsisartunut ilaasortat siunnersuutaat katillugit immikkoortut 57-it Naalakkersuisuniillu immikkoortut 29-t oqaluuserisassanut ilanngunneqarput.
Inatsisartut upernaakkut ataatsimiinnerisa juunip pingajuani naammassinissaat pilersaarutigineqarpoq.