Inatsisartut Upernaakkut ataatsimiissanngillat
Ualineruppat ataatsimiinneq matuneqassaaq, Inatsisartut ataatsimiititaliaannut ataavartunut allanut ilaasortassat qinerneqasssammata taavalu Siunnersuisoqatigiinnut aalajangiisartutullu ataatsimiititalianut ilaasortassanik Inatsisartut inassuteqaateqassammata.
Inatsisartut aqagu aamma Immikkut Ittumik ataatsimiipput, oqaluuserisassallu takuinnarlugit angersoorsuunngillat, taamaattorli nutaartaqarlutik.
Siullermik paasinarsissaaq, Inatsisartut upernaaakkut ataatsimiissanngitsut, Naalakkersuisut nutaat pisaanermik taama sivikitsigisumik tigumminnereerlutik oqaluuserisassanik nutaanik saqqummiussinissamut suli piariinngimmata.
Taamaammat taarsiullugu ukiakkut ataatsimiinnissamut aqagu ulluliisoqassaaq, taamanikkussamullu Naalakkersuisut siunnersuutissaminnik, naalakkersuisoqatigiinnissamut isumaqatigiissumminni nalunaarutigisaminnik, saqqummiussinissaat naatsorsuutigisinnaassavarput.
Taassuma saniatigut 2014-imi akileraarutitigut ilanngaatissatut siunnersuutit aqagu saqqummiunneqassapput. naalakkersuisut nutaat ilanngaatit angissusissaannik nutaanik siunnersuusiornissamut piffissaqarsimangillat, taamaakkaangallu ilanngaatit angissusiisa atuutiinnarnissaannik, Naalakkersooreersut tunuannginnerminni siunnersuuteqartarnerat ileqquuvoq. Taava siunnersuut politikkikkut arlaannaannulluunniit atannginnerusuusutut Naalakkersuisunngortut akuersaarsinaavaat. Tassalu taamaammat akileraarutini inummut ilanngaat aapaagu 48.000 koruuniussagunarpoq.