Inatsisartut upernaakkut ataatsimiinnerat ammarpoq

Inatsisartut upernaakkut ataatsimiinnerata aallartinnissaa nalunaaquttap akunneraajunnaarpoq.

Inatsisartut kingullermik qaammatip ataatsip matuma siorna ataatsimiikkunnaaraluartut oqaluuserisassat tulleriiaarneqarnissaat ajornanngitsuararsuusimavoq.

Inatsisartuni ilaasortat qaammat tulliuttoq suliassaaleqissanngeqaat. Ullut 17-t ataatsimiissapput oqaluuserisassallu 87-t eqqartorneqartussaassapput.

Oqaluuserisassat assigiinngitsorujussuupput.

Piginnittussaatitaaneq, nukissiuutit, aalisarneq piniarnerlu pisarnertut oqaluuserisassanut ilaapput. Oqaluuserisassat immikkuullarinnerusut ilaat tassaavoq nunatta arsaattartoqalernissaanik arsaattarfeqalernissaanillu Siumumeersup Otto Jeremiassenip naalakkersuisunut apeqquteqaataa.

Oqaluuserisassaq alla oqallisigineqangaatsiartussatut ilimagisarput tassaavoq; partiit politikerillu aningaasarsiaasa tapiiffigineqartarnerisalu qanoq amerlatigisunik aningaasaliiffigineqarnissaanik oqaluusserisassatut siunnersuut.

Assersuutigalugu naalakkersuisut partiinut tapiissutaasartut qaffarneqarnissaanik siunnersuusiortut, Demokraatit ikinnerusunik aningaasartuuteqarnissamik siunnersuusiorput.

Inatsisartut ataatsimiinnerini pisortatigoortumik arlalinnik pisoqartussaavoq. Soorlu Inatsisartut ombudsmandiata nunani avannarlerni killerni ombudsmandeqatini naapittussaavai tassungalu atatillugu 2005-imi ukiut qulinngortorsiorneq malunnartinniarneqassaaq.

Inatsisartuni ilaasortat tusagassiuutit qanoq atorneqarnissaannik pikkorissarnissaminnut aamma periarfissaqassapput. Qinikkallu maajip ulluisa sisamaanni Pinngortitaleriffimmut takusaanissaminnut neqeroorfigineqarsimapput.

Pilersaarutit naapertorneqassappata inatsisartut upernaakkut ataatsimiinnerat maajip 23-ani naassaaq.