Inatsisartut upernaakkut ataatsimiinnerat aallartippoq

Inatsisartut upernaakkut ataatsimiinnerat ullumi aallartippoq, 2015-imullu aningaasanut inatsit ukiaanerani siullermeerneqarluni suliarineqartussaagaluartoq aatsaat marsip qulingani suliarineqassaaq. Inatsit pillugu suleqatigiittoqassasoq aammalu aaqqissuusseqqinnissamut tunngasut oqallisigingaatsiarneqassasut, Naalakkersuisooqatigiit illuatungiliuttullu maluginiarsimavaat.
Forårssamlig i Inatsisartut Assi © : Nils Baum, Bureau for Inatsisartut
Allattoq Malu Pedersen
marsip 06-at 2015 18:51

- Isumaqatigiinninniarnerit aallartinnissaannut Inuit Ataqatigiinninngaanniit peqataaffigissuarput uumap aningaasanut inatsisissatut atuuttussanngortinniarneqartup amigartooruteqarnissaata annernartumik inuiaqatigiinnut sunniuteqannginnissaa taavalu amigartoortoqassappat amigartoorutit tassaasariaqarput siunissami ajornartorsiutaalertussanik pinngitsoortitsinermut aningaasartuutit, Inuit Ataqatigiit politikkikkut oqaaseqartartuat Aqqaluaq B. Egede oqarpoq.

Naalakkersuisooqatigiit aningaasaqarnermut ataatsimiititaliami siulittaasuata Jens Immanuelsenip maluginiarsimavaa ataatsimiititaliap ataatsimeeqattaarnerani aningaasanut inatsisip iluani suut suleqatigiissutigineqarsinnaanersut.

- Tassa allanngortiterinermik oqariartorpugut, siunissami nunatta nammineq aningaasatigut pitsaanerusumik ingerlalernissaa anguniarlugu. Taanna maluginiarneqarnerpaajuvoq, kisianni aamma malugineqarsinnaavoq aningaasanut inatsimmi taanna annertoorujussuunngimmat, kisiannilu oqaasertalerneqarluni 16-imi ukiullu kingulii taakku piumaartut, Jens Immanuelsen oqarpoq.

 

Aningaasanut inatsit eqqartorneqangaatsiassasoq

Taassuma aamma eqqaavaa aningaasanut inatsisip iluani eqqartuisoqangaatsiartoqassasoq, tassami ataatsimiititaliami ataatsimeeqqaarnerit siulliit iluanni ataatsimiititaliami ilaasortat oqallingaatsiarsimammata.

- Aaqqissuuseqqinnermut tunngasoq maluginiarneqarnerpaajusinnaasoq ilimanarneruvoq, taakkua oqallinnermi maannakkut pissasut, Jens Immanuelsen oqarpoq.

Jens Immanuelsennillu isumaqatigiinnginnermut suut iluaqutaasinnaanerinut siunnersuutissaqarpoq.

- Pisariaqartipparput ullumikkut aningaasaqarnerup killiffia eqqarsaatigalugu allanngortitsisoqartariaqartoq taassumallu orninnerani isummat assigiinngissinnaanerat aporfigivallaarnagit partiit akornanni suleqatigiinneq pingaartorujussuuvoq nunarput pillugu, Jens Immanuelsen oqarpoq.

 

Aaqqissuusseqqinnissaq isumaqatigiinngissutaasinnaasoq

Inuit Ataqatigiinniillu ilaasortaq assingusumik maluginiaqarsimavoq, isumaqarlunilu aningaasanut inatsisipp ataaniittoq aaqqissuusseqqinnissaq pillugu isumaqatigiinngissutaasussanut tunngaviusinnaasoq.

Inuit Ataqatigiinnimi nalorninartippaat aaqqissuusseqqinnissap iluani suna anguniarneqarnersoq sunalu isumaqatigiissutigineqarsinnaanersoq, illuatungeriit akornanni aammalu Naalakkersuisooqatigiit namminneq iluminni.

- Aaqqissuusseqqittoqassappat, taava tamakkiisumik aamma politikerit tamarmik isumaqatiginninniutigisinnaasaannik suliami Naalakkersuisut aallartitsissasut, tamannalu pinngilaq. Taamaammat suliat ukua piviusorsiortumik ingerlanneqassappata pisariaqarpoq. Taava aalajangiiffigisassatik siunnersuutit eqqortumik aningaasanik missingersuusiamik ingerlanneqarnissaat, Inuat Ataqatigiit politikkikkut oqaaseqartartuat Aqqaluaq B. Egede oqarpoq.