Inatsisartut upernaakkut ataatsimiilersut: Qilanaaqaanga!
Inatsisartut upernaakkut ataatsimiinnerat coronavirus pissutigalugu qaammammik ataatsimik kinguartinneqareerluni ullumikkut aallartiinnaqaaq.
Inatsisartuni partiit paarlersuaanni nuannallutillu pissangapput, sulinissaminnut oqallinnissaminnullu piareersimallutik.
AAMMA ATUARUK Upernaakkut ataatsimiinnissamut piareersaanerit aallartittut
Siumumeersoq Hermann Berthelsen ataatsimiinneq aallartinngitsiartoq naapipparput.
- Qilanaangaarama massakkut majualerpunga minutsit qulit qaangiuppata aatsaat aallartittussaagaluarluta, Hermann Berthelsen (S) oqarpoq.
Inuit Ataqatigiit siulittaasuat Muté B. Egede (IA) qilanaarluni aamma oqarpoq.
- Qilanaaqaagut aamma nukissaqaqaagut, Mute B. Egede (IA) oqarpoq.
Ataasimiinneq sivikinnerusoq
Ukioq manna ataatsimiinneq sivikinnerussaaq. Maajip 29-ata tungaanut ullunik ataatsimiiffiusunik arfineq pingasunik sivisussuseqassangatinneqarpoq.
Partiillu inatsisissatut siunnersuutissaat tunuartinneqarnikuupput.
Inatsisartut siulittaasuat Vivian Motzfeldt ataatsimiinnissamut oqallinnissamullu qilnaarsimalluni oqarpoq.
Maanna ataatsimiinnermi Inatsisartut ukiaq kingulleq ataatsimiinnerminni oqaluuserisassat kinguartitatik ataatsimiissutigissaagaat, Vivian Motzfeldt ilisimatitsivoq.
- Taakkulu avataatigut partiit tamarmik oqallisissianik saqqummiussaqarnissaanut periarfissinneqarnikuupput aamma taakkua oqallisigineqarlutillu naammassineqassapput, Vivian Motzfeldt oqarpoq.
Partiit inatsisissanik siunnersuuteqarsinnaanerat killeqartinneqarmat ilungersunartutut isigineqarpoq.
- Erloqinarpoq, imaannaanngilaarpoq, sulerusukkaluarluni oqaluuserisassat suliat ingerlareersut eqqartoqqiinnartussaallugit, Jens Napaattooq oqarpoq.
Sapaatit akunneri marluinnaat ataatsimiinnissaq nalinginnaasumit allaanerulluinnartoq, Demokraatineersoq Justus Hansen oqarpoq.
- Sapaatit akunneri marluinnaasut eqqumiilaarpoq.
Nuummukarnissaminut nalornisoq
Taassuma coronavirusimik tunillatsisimasoqarfiusumut Nuummukarnissani nalornissutigisimagaluarpaa.
- Tasiilaminngaanneerpunga qujanartumik viruseqanngilaq tasamani, ilaquttakka oqaloqativakka: Maangarnissara pisariaqarpa? Soorunami, kisianni inatsisit taamaapput. Maaniittariaqarpunga Inatsisartunut ilaasortaagama, Justus Hansen oqarpoq.
Coronami akunnattuungatitsigaluartoq katersuunissaq oqallinnissarlu pisariaqartut, Aqqalu Jerimiassen oqarpoq.
- Qujanarneruvoq suna tamarmi uniinnarani ingerlagami. Taannartaa pitsaaqqutitut isigisinnaavara - suna tamaat ajortuinnartut isigisinnaannginnatsigit.