Inatsisartut ullumikkut oqaluuserisassaat

Inatsisartut 2007-imi upernaakkut ataatsimiinnerat ullumi nal. ataatsinut aallartissaaq. Upernaakkut ataatsimiinneq maajip aappaata tungaanut ingerlanneqassaaq. Taamaattorli ataatsimiinneq marsip 30-anniit apriilip 11-annut poorskimi sulinngiffeqarnermut atatillugu unitsikkallarneqassaaq.

Upernaakkut ataatsimiinnerup ulluani siullermi oqaluuserisassat arfineq-pingasuupput.

Ullumikkut oqaluuserisassaq pingaarutilik tassaavoq kommunit kattussuunneqarnissaat, tassa Nunatsinni kommunit 18-usut kattussuunniarneqarmata kommuninut angisuunut sisamanut (oqaluuserisassaq 26, siullermeerneqarnera). Tamatumunnga atatillugu aammattaaq siunnersuutigineqarpoq kommunersuarnut ikaarsaarnermik suliaqartussanik ataatsimiititaliornissamik Naalakkersuisut inatsisissatut siunnersuummik saqqummiussissasut (oqaluuserisassaq 27, siullermeerneqarnera).

Tamatuma saniatigut inatsisartunut ilaasortaq Anthon Frederiksen kommunit kattussuunneqarnissaat pillugu arlalinnik apeqquteqaateqarpoq. Ilaatigut apeqqutigaa 2009-mut missingersuutinut akisussaaneq maanna kommunalbestyrelsiusut nutaamillu kommunalbestyrelsinngortussat agguataassaneraat? (oqaluuserisassaq 75).

Oqaluuserisassaq alla tassaavoq ineqarnermut attaveqarnermullu naalakkersuisumik qinersinissaq. Naalakkersuisut siulittaasuata Kim Kielsen naalakkersuisunut ilaasortanngussasoq siunnersuutigaa, taassumalu qinigaassaguni naalakkersuisunut ilaasortatut tunuartoq Jørgen Wæver Johansen taarsissavaa.