Inatsisartut ullumi tamarmiunngitsut
Asii Chemnitz Narup. Johan Lund Olsen. Josef Motzfeldt. Jørgen Wæver Johansen allallu arlallit.
Inatsisartut ullumi ataatsimiinneranni Inatsisartuni Naalakkersuisunilu ilaasortat taagorneqartut peqataanngillat, ataatsimeersuarnerit, angalanerit suliassanullu allanut peqataanertik pissutigalugu. Tamannalu Inatsisartut ullumi ataatsimiinneranni maluginngitsuugassaanngilaq.
Inatsisartut upernaakkut ataatsimiinneranni naalakkersuisuni ilaasortat arlallit inatsisartunilu qinikkat arlaqartut ataatsimiittarfimmiinnginnerat immikkut maluginiagassaavoq. Ataatsimiinnerup ingerlanerani qinikkat arlallit susassaqarunarlutik aniammata ataatsimiittut tallimaannanngoraluarput, anisimasulli isaaqqimmata amerliallaqqillutik. Naalakkersuisuni ilaasortat Asii Chemnitz Narup, Josef Motzfeldt, Jørgen Wæver Johansen, ullumi ataatsimiittarfimmiinngillat. Ataatsimeersuarnernut peqataanerit angalanerit suliassallu allat ataatsimiittut tamarmiunnginnerannut pissutaasut oqaatigineqarpoq.
Inatsisartut ullumi ataatsimiinerat inatsisinut pioreersunut aaqqiissutissatut siunnersuutinik imaqarneruvoq.
Tipsernermit lottornermillu iluanaarutaasunik agguaassisarnerup Sorlammit ingerlanneqalernissaanik Ilinniartitaanermut Naalakkersuisup Doris Jakobsenip siunnersuutaata aappassaaneerneqartigani Kultureqarnermut Ilinniartitaanermullu Ataatsimiititalimut ingerlateqqaarneqarnissaa amerlanernit kissaatigineqarpoq.
Radiomi TV-milu aallakaatitsisarneq pillugu peqqussutip erseqqissarneqarnissaanik naleqqussarneqarnissaanillu Ilinniartitaanermut Naalakkersuisoq Doris Jakobsen aamma siunnersuuteqarpoq. Siunnersuut KNR-mi siulersuisunik toqqaasarnermi sumi najugaqarnerup apeqqutaajunnaarsinneqarnissaanik ilaatigut imaqarpoq, taamalu isikkoqarluni aappassaanneerneqarnissaanut akuersaarput naalakkersuisooqatigiit Atassut, IA aamma Siumut. Demokraatit Kattusseqatigiillu isumaqarput siunnersuutineqartoq aappassaanneerneqartigani Kultureqarnermut Ilinniartitaanermullu Ataatsimiititaliami oqaluuserineqaqqaartariaqartoq.
Qanoruumik ukioq naallugu aallakaatitsisalernissaq Siumumit kissaatigineqarpoq, aallakaatittakkallu sapinngisamik qallunarnippallaat ikilisarneqarnissaat Kattusseqatigiit Partiiannit kissaatigineqarluni.
Qinikkat ataatsimiinnermik nalaanni ataatsimiittarfimmiittannginnerat nunani allani aamma takornartaanngilaq. Danmarkimi Folketingimi ilaasortat ilaat, taasisoqalersillugu ataatsimiittarfimmut aatsaat isaasarnerat assersuutigineqarsinnaavoq.
