Inatsisartut ullumi oqaluuserisassaat

Siulliullugu naalakkersuisut siulittaasuata oqaluuserisassanngortitaa oqaluuserineqassaaq tassalu; Kalaallit Nunaanni aningaasat pappiaqqat pillugit inatsisissatut siunnersuummut inatsisartut oqaaseqaateqarnissaat pillugu siunnersuutaa.

Taamatuttaaq Johan Lund Olsenimit siunnersuutigineqassaaq, nunatsinni suliffeqarfinnik tunisisoqartillugu sulisut inatsisitigut illersugaalernissaat.

Kiisalu Siumut inatsisartunut ilaasortaatitaasa siunnersuutigissavaat, nunatsinni inuussutissarsiutinut qularnaveeqqusiisarnermut aningaasaateqarfimmik pilersitsinissamik naalakkersuisut peqquneqarnissaat.

Taamatuttaaq takornariat eqqarsaatigalugit Siumukkut siunnersuutigissavaat, inoqarfiit avataanni nunaminertani takornariartitsinermik ingerlatsisoqartalernissaa.

Kingulliullugu oqaluuserineqartussaq Kattusseqatigiinniit Anthon Frederiksenimit siunnersuutigineqassaaq, taassuma siunnersuutigissavaa; nunatsinni suliffeqarfiit kiisalu ingerlatseqatigiiffiit aammalu piginneqatigiilluni ingerlatsiviit aqutsisoqarfiat Danmarkimiit ingerlanneqartut nunatsinnut nuunneqarnissaat.