Inatsisartut ullumi naggataarallarput
Inatsisartut upernaajunerani ataatsimiinnerisa kingullersaanni oqaluuserisassaat tamangajammik aappassaaneerlugillu pingajussaaniissavaat. Meeqqanik sumiginnaasarneq pillugu qaammarsaanissamiit sanaartornermut aningaasaateqarfiup killiffia kiisalu eqqartuussiveqarneq pillugu nunatsinnit oqaaseqaatissaq oqaluuserisassanut ilaapput.
Aappassaanerlugu oqaluuserineqartussaq, tassalu meeqqat sumiginnarneqarsimasut pillugit innuttaasunut ukioq-manna qaammarsaanissaq paasisitsiniaanissarlu Agathe Fontainip, IA-meersup oqaluserisassanngortitaa naalakkersuisunit ilalerneqanngilaq, ukioq-manna akissaqartinneqanngimmat. Naalakkersuisulli aappaagumut akissanik ujaasiniarput, peqatigitillugulu aqutsisoqatigiinnik pilersitsisoqarnissaa siunniuppaat.
Inatsisartuni oqaluuserisassat ilagaat nunatsinni meeqqanik inuussuttuaqqanillu sullissisunik atorfinitsitsisarnermi pineqaatissinneqarsimanermik takussutissiisoqartarlernissaanik, siumumeersup Doris Jakobsenip siunnersutaa. Oqaluuserisassap aappassaaneernissaanut inatsisit atortinneqarnerannut ataatsimiititaliaa isumaliutissiissuteqarpoq. Ataatsimiititaliallu inassutigaa Doris Jakobsenip siunnersuutaa allanngortinnagu inatsisartut tapersertariaqaraat.
Inatsisartut upernarnerani ullumi naggammik ataatsimiittussaaneranni siullermeerutaasumik aamma oqaluserisassaqarput, Kalaallit Nunaanni eqqartuussiveqarneq pillugu isumaliutissiissummut Namminersornerullutik Oqartussat oqaaseqaatissaat oqaluuserineqassaaq, naalakkersuisut kissaatigaat oqaaseqaatissamut inatsisartut ilanngunneqartariaqartut, naalakkersuisullu naqissuserpaat eqqartuussiveqarnermut ataatsimiititaliap siunnersuutai tapersersorneqartariaqartut. Oqaluuserisassaq ukiaru aappassaaneerneqartigani naalakkersuisut aggustimi eqqartuusiveqarneq pillugu isumasioqatigiissitsiniarput.
Naalakkersuisut sanaartornermut nutaanngorsaanermullu aningaasaateqarfik pillugu ullumi aamma nassuiaateqassapput, aningaasat 700 milliuuni koruunit atorneqarsimanatik aningaasaateqarfimmi uninngatiinnarneqarsimapput.
Qularnanngitsumillu inatsisartunit apeqqutigineqassaaq sooq aningaasat 700 milliuuni koruunit siunertaminnut atorneqarsimannginnerunersut, Namminersornerullutik Oqartussammi ukioq-manna sanaartugassanut aningaasaliissutit affaannaat atorsimavaat.
Oqaluuserisat aningaasaliiffigineqartussat amerlanersaat ukiaru pingajussaaneerneqassapput, aappaagumut aningaasanut inatsisissamut ilanngunneqartussaammata.
