Inatsisartut Ullumi naggammik ataatsimiilersut

Inatsisartut upernaakkut ataatsimiinnertik ullumi naggataassavaat.

Inatsisartut aqqanermut ataatsimiinnerat aallanerlugu, ilinniartitaanermut, Kultureqarnermut, Ilisimatusarnermut, Ilageeqarnermullu naalakkersuisoq Doris Jakobsen apeqqarissaarfigineqassaaq.

Tamatuma kingorna immikkoortut arfineq marluk ullormi oqaluuserineqartussat tullinnguussapput.

Demokraatineersup Justus Hansenip Tasiilami mittarfiliornissamik suliassap Kalaallit Airports A/S-ip ataani suliassanngortinneqarnissaanik siunnersuutaa, kiisalu Nuummi Ilulissanilu mittarfiit tallilerneqarnissaat Qaqortumilu mittarfeqalernissaa oqaluuserineqaqqaassapput.

Siunnersuulli amerlanerussuteqartunit itigartinneqarpoq innersuunneqarporlu ukiakkut ataatsimiinnermi oqaluuserineqassasoq.

Umiatsiaararsorlutik aalisartut saarullinnik qassutinik bundgarninillu pisarineqartunik pisarineqareerlutik aniseqqinneqartut annertussusaat pillugit nalunaaruteqartarnissaannik siunnersuut aamma oqaluuserineqassaaq.

Inuit Ataqatigiit Demokraatillu siunnersuummut ilaliipput.

Raajartassat

Kitaani raajanut TAC-p agguaanneqarnerani sinerissap qanittuani aalisartunut avataasiortunullu assigiimmik 50/50-nngortitsisoqarnissaanik siunnersuut aappassaaneerlugu oqaluuserineqassaaq. 

Sulisitsisut Peqatigiiffiat KNAPK-lu siunnersuummut akerliupput, aalisarnermulli inatsimmut suliarineqarnissaa aalisarnermut ataatsimiititaliap tapersepaa.

Nalinginnaasumik paarsinersiutit pillugit inatsit ullumi aappassaaneerneqassaaq. 

Angajoqqaarsiat aningaasarsiaat januaarip aallaqqaataanit 2018-imi qaammammut 8.000 koruuninngortinniarneqarput.