Inatsisartut ullumi ataatsimiinnissaannit

Inatsisartut ullumi ataatsimiinnissaanni oqaluuserineqartussat qulingiluaassaapput, tassa ullormut oqaluuserisassat ullaap tungaani allannguuteqassanngippata. Ullumikkut oqaluuserineqartussanut ilaavoq Ane Hansen-ip Inuit Ataqatigiinneersup siunnersuutaa, tassa nunaqarfinni aqutsisut pisinnaatitaaffiisa annertusarneqarnissaannut aningaasaliisoqartalernissaannik imaqartoq.

Ullumi aamma oqaluuserineqassaaq pisortanut akiitsut akilersinniarneqartarnerat pisortanullu akilingassaqalertarnerup pinaveersaartinneqarnissaanik inatsisip allanngortinneqarnissaanut Aningaasaqarnermut naalakkersuisup Josef Motzfeldtip siunnersuutaa.

Akiliisitsiniartarnermut tunngasoq alla Inatsisartut ullumikkut oqaluuserisassaannut ilaavoq. Tassa kommuneqarfiit akiligassiissutinik akiligassiisarneq akiliisitsiniartarnerlu pillugit suleqatigiinnissaannik siunnersuut aamma sammineqassaaq.

Doris Jakobsen-ip Siumumeersup Atuarfitsialammi ilinniarfinnilu atuartut ilinniartullu soraarummeernerminni namminneerlutik oqaatsiminnik atuinerat qulakkeerniarlugu nutserisoqartalernissaannik siunnersuutaata aappassaaneerneqarnera ullumikkut aamma oqaluuserineqartussaniippoq.